Respýblıkalyq bıýdjet kiristeri 14,6 trln teńge kóleminde josparlanyp otyr
«Sizderdiń qaraýlaryńyzǵa 2023 jylǵa arnalǵan respýblıkalyq bıýdjetti naqtylaý týraly zań jobasy usynylyp otyr. Zań jobasy Prezıdent Joldaýy men saılaýaldy baǵdarlamasynyń is-sharalaryn, sondaı-aq birqatar basqa da mindetterdi qarjylyq qamtamasyz etý maqsatynda ázirlendi. Osy jylǵa arnalǵan respýblıkalyq bıýdjetti naqtylaýdy daıyndaý kezinde mynadaı tásilder qoldanyldy. Birinshi, 2023 jylǵa arnalǵan áleýmettik-ekonomıkalyq damý boljamynyń kórsetkishteri buryn bekitilgen deńgeıde saqtaldy. Ekinshi, bıýdjet tapshylyǵynyń mólsheri jalpy ishki ónimniń 2,7 paıyzyn quraıdy. Bul belgilengen bıýdjettik qaǵıdalarǵa sáıkes keledi», - dedi ol.
Onyń atap ótýinshe, úshinshiden, osy jylǵa arnalǵan respýblıkalyq bıýdjettiń kiristeri 721 mlrd teńgege ulǵaıdy. Kirister ósýiniń negizgi faktorlary birjolǵy túsimder, sondaı-aq salyqtyq jáne kedendik ákimshilendirýdiń jaqsarýy bolyp tabylady. Tórtinshi, Joldaý men saılaýaldy baǵdarlamanyń is-sharalaryn qarjylyq qamtamasyz etý maqsatynda qosymsha 800 mlrd. teńge somasynda Ulttyq qordan nysanaly transfert tartyldy. Besinshi, bıýdjet shyǵystarynyń ishinde 672 mlrd teńge somasynda shyǵystardy qaıta bólý júzege asyryldy.
«Nátıjesinde 2023 jylǵa arnalǵan transfertterdi esepke almaǵanda respýblıkalyq bıýdjettiń kiristeri 14,6 trln teńge kóleminde josparlanyp otyr. Jalpy alǵanda bıýdjettiń óz kiristeriniń ósimi ótken jylmen salystyrǵanda shamamen 4,2 trln teńgeni nemese 40 paıyzdy quraıdy. Bıýdjettiń kiristeri men shyǵystaryn qaıta qaraýdy eskere otyryp, 2023 jylǵa arnalǵan respýblıkalyq bıýdjettiń parametrleri bylaısha qalyptasty. Bıýdjet túsimderi 1,5 trln teńgege ulǵaıyp 19,3 trln teńgeni quraıdy. Bıýdjet shyǵystaryda 1,5 trln teńgege artyp 22,5 trln teńgege jetedi», - dedi Dáýren Temirbekov.
