Respýblıkalyq balalardy ońaltý ortalyǵynda sal balalardy aıaqqa turǵyzýdyń biregeı ádisteri qoldanylýda

Bul týraly «Ulttyq medıtsınalyq holdıngi» AQ-nyń baspasóz qyzmetinen habarlady.

4 jyl buryn ashylǵan Respýblıkalyq balalardy ońaltý ortalyǵynda osy jyldar ishinde 14 myń bala emdelýden ótti. Nátıjesinde, sal aýrýymen syrqattanatyn 300 jetkinshek óz aıaǵymen júre alatyn deńgeıge jetti.

«Ortalyq emdelýshileriniń 65 paıyzyna jýyǵy - balalardyń tserebraldy sal arýymen syrqattanatyndar. Munda Qazaqstannan ǵana emes, Reseıden, sonymen birge alys shetelderden kelip em-dom alatyndar da bar. Qazaqstandyq balalar úshin dárigerlik járdem kvota boıynsha kepildendirilgen tegin medıtsınalyq járdem sheńberinde júrgiziledi», - delingen habarlamada.

Respýblıkalyq balalardy ońaltý ortalyǵy zamanaýı tehnıkalarmen jaraqtalǵan. Munda fızıoterapııa, emdik jattyǵý kabınetteri jáne protez jasaıtyn shaǵyn zaýyt bar.

Ortalyq búginde ońaltýdyń medıtsınalyq, pedagogıkalyq jáne áleýmettik aspektilerin qamtıtyn respýblıkadaǵy jalǵyz mekeme. Sońy zamanaýı ádisterdiń kómegimen balalar júrip-turýǵa, denesin tik ustaýǵa, sóıleýge jáne óz betinshe oılaýǵa úıretiledi.      

«Ortalyqtyń sońǵy jańalyqtarynyń biri - osynda qoldana bastaǵan «Lokomat» robottandyrylǵan kesheni. Ol balalar men eresekterdiń júıke júıesiniń qozǵaǵysh fýnktsııalary patologııalaryn qalpyna keltirýge múmkindik beredi. «Lokomattyń» tolyq kýrsynan búginde 50-den astam emdelýshi ótti», - dep jazady «Ulttyq medıtsınalyq holdıngi» AQ.