Respýblıkalyq áıelder keńesi: Memleket basshysynyń halyqtyq reformalary - Qazaqstan damýyndaǵy mańyzdy qadam
ASTANA. QazAqparat - «Respýblıkalyq áıelder keńesi» qoǵamdyq birlestigi Qazaqstan Respýblıkasynyń Prezıdenti Nursultan Nazarbaevty qyzmetine resmı túrde kirisýimen quttyqtady.
«Asa qurmetti Nursultan Ábishuly!
Qazaqstandyq áıelder atynan Sizdi Qazaqstan Respýblıkasynyń Prezıdentiniń qyzmetine resmı túrde kirisýińizben quttyqtaımyz!
«Respýblıkalyq áıelder keńesi» QB ulyqtaý rásiminde Siz atap ótken bes ınstıtýtsıonaldyq reformany júzege asyrý mindetterin biraýyzdan qoldaıdy. Biz ekonomıkalyq baǵdarlamalardyń tıimdiligi men memlekettik qyzmetterdiń sapasyn arttyrýǵa baǵyttalǵan zamanaýı avtonomdy memlekettik apparat qurý mańyzdy ári aýqymdy tapsyrma dep esepteımiz.
Merıtokratııa qaǵıdaty boıynsha teń dárejede memlekettik qyzmetke degen qoljetimdilikti qamtamasyz etý, mansaptyq ósýdiń ádil júıesi jáne qyzmetkerlerdi yntalandyrý - bul júrgizilip jatqan memlekettik apparattyń júıeli reformalarynyń jalǵasy. Mundaı júıe jańa múmkindikterge jol ashady. Siz usynǵan sharalar ashyqtyq pen seriktestik negizinde memlekettiń azamattyq qoǵam ınstıtýttarymen yqpaldastyq mehanızminiń jetilýine septesedi dep senemiz», delingen quttyqtaýda.
Sondaı-aq keńes músheleriniń aıtýynsha, ekonomıkalyq ósimge jaǵdaı jasaıtyn zańnyń ústemdigi men menshik quqyǵynyń kepili azamattardyń iskerlik belsendiliginiń artýyna serpin beredi. Sot isiniń biliktilik júıesi men quqyq qorǵaý organdarynyń ashyqtyǵy azamattardyń bul júıelerge degen senimi men turǵyndardyń quqyqtyq saýattylyǵyn arttyryp, azamattyq bastamalardy júzege asyrýlary úshin qolaıly jaǵdaı týdyrady.
«Óńdeý ónerkásibin, iri bıznesti sonymen qatar shaǵyn jáne orta bıznesti damytý aımaqtardyń ınfraqurylymyna oń áserin tıgizip, jalpy azamattyq qoǵamnyń damýyna baǵyttalady. Memleket basshysynyń halyqtyq reformalary - qazirgi zamanǵy el retinde Qazaqstannyń damýyndaǵy taǵy bir mańyzdy qadam», dep túıindelgen quttyqtaýda.
