Respýblıkalyq avtojoldar boıyndaǵy 374 «salqyn dárethana» buzylady – mınıstrlik

ASTANA. QazAqparat – Respýblıkalyq avtojoldar boıyndaǵy 374 «salqyn dárethanany» buzý sheshimi qabyldandy. Bul týraly QR Indýstrııa jáne ınfraqurylymdyq damý mınıstrliginen málim etti, dep habarlaıdy QazAqparat.

Búgingi tańda respýblıkalyq mańyzy bar avtomobıl joldarynyń boıynda 1700-ge jýyq qyzmet kórsetý nysany bar. Onyń ishinde 1 147 nysan nemese 70% ulttyq standart talaptaryna sáıkes keledi. Bıyl jol boıynda ornalasqan taǵy 80 qyzmet kórsetý nysanyn ashý kózdelip otyr.

Málimetke sáıkes, qazir respýblıkalyq mańyzy bar joldardyń boıynda 618 demalys alańy bar. Olarda jeke ınvestıtsııalar esebinen modýldik úlgidegi sanıtarlyq-gıgıenalyq toraptar (SGT) ornatýǵa bolady. Osyǵan baılanysty shaǵyn jáne orta bıznes ókilderimen jumys júrgizilip jatyn. Kásipkerler SGT ornalasqan pavılonda saýda alańdaryn jasaqtaı alady. Búgingi tańda 53 modýldik SGT jumys isteıdi, jyl sońyna deıin demalys alańdarynda osyndaı 20 nysandy ornatý josparlanǵan.

Sonymen qatar janarmaı quıý stantsııalarynyń iri jelilerinde zamanaýı saýda alańdary qarastyrylǵan.

«Qazirgi ýaqytta respýblıkalyq joldardyń boıynda 374 «salqyn dárethana» ornatyldy. Túsip jatqan shaǵymdarǵa baılanysty mundaı obektilerdi kezeń-kezeńimen bólshekteý týraly sheshim qabyldandy. Búgingi tańda 15 «salqyn dárethana» buzyldy. Osy másele boıynsha jumys jalǵasatyn bolady», - delingen mınıstrlik habarlamasynda.

Sondaı-aq usynylǵan aqparatqa súıensek, marshrýt boıyndaǵy barlyq nysandarmen tanysýǵa, olardyń reıtıngin kórýge, demalys aıaldamalaryn aldyn ala josparlaýǵa múmkindik beretin mobıldik qosymsha jasalyp jatyr. Qosymsha ınternetsiz de jumys isteı bermek. Ol bıylǵy jeltoqsan aıynda iske qosylady.