Respýblıkalyq áskerı-patrıottyq ánder baıqaýynyń bas júldesin «Sarbazdar áni» jeńip aldy
ASTANA. QazAqparat - 26 qarashada respýblıkalyq áskerı-patrıottyq ánder baıqaýynyń jeńimpazdary jarııalandy.
«Áskerı ánder» radıofestıvali - «Qazaqstan» RTRK AQ «Qazaq radıosy» men Qazaqstan Respýblıkasy Qorǵanys mınıstrliginiń birlesken jobasy.
«Qazaqstan» RTRK AQ baspasóz qyzmetiniń habarlaýynsha, jeńimpazdar tórt nomınatsııa boıynsha marapattaldy. «Úzdik aqyn» nomınatsııasy boıynsha ánniń sózi men sazyn ózi jazyp shyqqan Nurlan Nurtazın jeńiske jetti. «Sarbazdary qazaqtyń» ánimen sahnaǵa shyqqan Talǵat Kúzembaev «Úzdik oryndaýshy» atandy. «Máńgilik el» ániniń avtory Maqsat Jaýtıkov «Úzdik kompozıtor» ataǵyna laıyq dep tanyldy. Radıofestıvaldiń Bas júldesi «Sarbazdar ánine» buıyrdy. Óleńi Asqar Dúısenbiniki, áni Qurmash Mahandiki. Oryndaǵandar - Jubanysh Jeksenuly, Qurmash Mahan, Dáýren Seıtjan.
Keńes Odaǵynyń Batyry, Qazaqstan Respýblıkasynyń birinshi Qorǵanys mınıstri, Halyq Qaharmany, Ásker generaly Saǵadat Nurmaǵambetovtiń esteligine arnalyp arnaıy baıqaýǵa án jazyldy. Ony Nurlan Nurtazın men Juldyzbek Úteshqalıev oryndady.
Radıofestıval jeńimpazdaryn marapattaý rásimi kezinde «Qazaqstan» RTRK» AQ Tóraıymy Nurjan Muhamedjanova «óskeleń urpaqty patrıottyq rýht tárbıeleýde» osyndaı baıqaýlardy ótkizýdiń mańyzy erekshe zor ekendigin atap ótti.
Radıofıestıvaldi ótkizý arqyly áskerı ánderdi keń kólemde nasıhattaý, ulttyq mádenıetke, ónerge degen qurmet senimin qalyptastyrý maqsaty kózdelgen.
Joba jyl basynda bastaý alyp, osy ýaqyt ishinde radıofestıvalge barlyǵy 200-den astam án kelip tústi, onyń ishinen eń úzdik degen 13 án nátıjesinde fınalǵa joldama aldy. Baıqaý Kongress-holl saraıynda úlken Gala-kontsertpen aıaqtaldy.
Radıofestıvalǵa árbir Qazaqstan azamaty qatysty: Qazaqstan aýmaǵyndaǵy áskerı bólimderdiń sarbazdarynan bastap, kásibı ánshiler men kórkemdik-ónerpazdar ujymdarynyń ókilderine deıin. Baıqaýdyń basty talaptarynyń biri buǵan deıin esh jerde aıtylmaǵan qazaq halqynyń áskerı-rýhty ánderin túrli oryndaýshylyq mánerde (dástúrli, akademııalyq, estradalyq) oryndaý boldy. Kóptegen án avtorlary úlken sahnaǵa shyǵý tájirıbesi joq ónerpazdar.
9 aı ishinde kórkemdik keńestiń irikteýinen ótken ánder «Qazaq radıosy» men «Shalqar» ulttyq arnasy efırlerinen berildi.
Aıta keteıik, radıofestıvalǵa qatysýǵa tilek bildirgen úmitkerler shyǵarmalaryn jandy daýysta oryndady.
