Respýblıkalyq «Altyn qalam» ádebı baıqaýynyń jeńimpazdary marapattaldy

ASTANA. QazAqparat - Respýblıkalyq «Altyn qalam» táýelsiz ádebı baıqaýy óz máresine jetti. Jeńimpazdardy marapattaý rásimi 10 qyrkúıek kúni Yqylas Dúkenuly atyndaǵy respýblıkalyq mýzykalyq aspaptar murajaıynda ótti.

Baıqaýǵa qatysýshylar «Jyldyń eń úzdik poezııasy», «Jyldyń eń úzdik prozasy», «Jyldyń eń úzdik dramatýrgııasy», «Jyldyń eń úzdik balalar shyǵarmasy», «Qazaq ádebıetine qosqan eleýli eńbegi úshin» nomınatsııalary boıynsha ózara synǵa tústi. «Jyldyń eń úzdik poezııasy» atalymy boıynsha «Jol» óleńimen Orazbek Saparhan jeńimpaz atansa, «Jyldyń eń úzdik prozasy» atalymy boıynsha «Muńlyq» áńgimesimen Sáken Sybanbaı basqalardan oq boıy ozyq shyqty. Al «Jyldyń eń úzdik dramatýrgııasy» atalymy boıynsha «Zaveşanıe Ibraıa» shyǵarmasymen Aqylbek Shaıahmet, «Jyldyń eń úzdik balalar shyǵarmasy» atalymy boıynsha «Kıiz úı» týyndysymen Botakóz Jalmaǵanbetova úzdik dep tanyldy. «Qazaq ádebıetine qosqan eleýli eńbegi úshin» atalymy boıynsha júldeni aqyn Esenǵalı Raýshanov ıelendi. Aıta keteıik, respýblıkalyq «Altyn qalam» ádebı baıqaýy 2010 jyldyń mamyr aıynan beri ótkizilip keledi. Baıqaýdyń negizgi maqsaty - rýhanı-mádenı qundylyqtardy damyta otyryp, jas talanttardy halyqqa keńinen tanystyrý, dep habarlaıdy Ádebıet portaly.