Respýblıkalyq alaman aıtystyń jeńimpazdary anyqtaldy
Oblystyq «Jastar resýrstyq ortalyǵy» uıymdastyrǵan alaman aıtys dástúrli túrde úshinshi jyly jalǵasyn taýyp keledi. Bul jolǵy jyr dodasy Elbasynyń «Bolashaqqa baǵdar: rýhanı jańǵyrý» baǵdarlamalyq maqalasyn iske asyrý aıasynda QR Tuńǵysh Prezıdenti kúnine jáne Táýelsizdik merekesine arnaldy. Aıtys dese ishken asyn jerge qoıatyn kórermender zalǵa lyq toldy. Bes juptan quralǵan on aqyn jyr dodanyń dúrmegin taratty. Top aldynda aýdandyq, oblystyq, respýblıkalyq sheńberdegi aıtystardyń dúldúlderi, qolma-qol sýyryp salma aqyndar kósile shapty.
Aqyndar jalyndy jyrdan sóz órnektep, qyz ben jigit, aǵa-ini aıtysynyń erekshe úlgisin kórsetti. Ózara ádemi qaljyńmen sóz marjanyn órbite bildi.
Ádil-qazylardyń sheshimimen, bas júlde shym shahardyń jas aqyny Birjan Baıtýovqa buıyrsa, birinshi oryndy qaraǵandylyq Dıdar Qamıev jeńip aldy. Al ekinshi oryn qyzylordalyq Muhtar Nııazovqa berilse, ońtústiktiń aqyny Nurlan Esenqulov úshinshi oryndy mise tutty. Aıtyskerlerdiń barlyǵy birdeı uıymdastyrýshylar tarapynan qarjylaı syılyqtarǵa ıe boldy.
