Respýblıkalyq ákeler forýmyna qatysýshylar Býrabaıda bas qosty
KÓKShETAÝ. QazAqparat - Býrabaıda Qazaqstan Respýblıkasynyń Aqparat jáne qoǵamdyq damý mınıstrligi, Qazaqstan Respýblıkasy Prezıdentiniń janyndaǵy Áıelder isteri jáne otbasy-demografııalyq saıasat jónindegi Ulttyq komıssııa Aqmola oblysynyń ákimdigimen jáne «Ákeler odaǵy» qoǵamdyq birlestigimen birlesip, «Áke – otbasynyń tiregi» atty 4-shi respýblıkalyq ákeler forýmyn ótkizdi, dep habarlaıdy QazAqparat tilshisi.
Alqaly jıynda otbasy ınstıtýtyn jáne otbasylyq tárbıedegi ákeniń rólin nyǵaıtý, «Rýhanı jańǵyrý» qoǵamdyq sanany jańǵyrtý aıasynda balalardyń patrıottyq sezimin qalyptastyrýǵa, bilimge umtylysty ósirýge qoǵamnyń nazaryn aýdarý máseleleri talqylandy. Forýmnyń jumysyna «Ákeler odaǵy» qoǵamdyq birlestigi men ulttyq komıssııa músheleri, ortalyq memlekettik jáne jergilikti atqarýshy organdardyń basshylary, qoǵam qaıratkerleri, úkimettik emes uıymdardyń ókilderi, úlgili ákeler – barlyq óńirden kelgen 150 delegat qatysty.
«Qazir otbasy tárbıesindegi ákeniń rólin kóterý, balalardyń boıynda partıottyq sezimdi oıatyp, adamgershilik qundylyqtardy qalyptastyrýdaǵy áke rólin nyǵatý máselelerine qoǵam nazaryn aýdarý qajet», – deı kele, Baqytbek Smaǵulov «Ákeler odaǵy» qoǵamdyq birlestiginiń negizin qalaǵan Qýanysh Jumataevtyń ata-anasyna «Namys» tósbelgisin tapsyrdy.
Forýmǵa jınalǵandarǵa oblys ákimi Ermek Marjyqpaevtyń ystyq sálemin jetkizgen oblys ákiminiń orynbasary Aına Mysyrálimova adam ómiri otbasynan bastalatynyn, halqymyz ákeni asqar taýǵa balaǵanyn, jumaq ananyń tabanynyń astynda dep analarǵa qurmet kórsetkenin, bala – baýyr eti dep urpaǵyna aıryqsha qamqorlyq tanytqanyn aıta kele, ata-anaǵa qurmetpen qarap, alańsyz qarttyqty syılaý árbir adamnyń qasıetti boryshy ekenin atap ótti.
«Otbasy – qoǵamymyzdyń negizin quraýshy mańyzdy ınstıtýt bolyp tabylady. Qoǵamda óz ornymyzdy taýyp, aq pen qarany ajyrata bilýde januıadan alǵan jylylyqtyń mańyzy zor. Oblysta otbasyn qoldaý maqsatynda resýrstyq ortalyq, áleýmettik qyzmetter, qoǵamdyq birlestikter jumys isteıdi. «Rýhanı jańǵyrý» baǵdarlamasy sheńberinde «Otbasy álemi» jobasy, «Baqytty otbasy» klýby júzege asyrylýda. Óńirimizde 14 myńnan astam kópbalaly otbasy tursa, onyń 7700-i áleýmettik kómekpen qamtyldy», – dedi Aına Mysyrálimova. Sonymen qatar, «Áke – otbasynyń tiregi» forýmyn uıymdastyrýshylarǵa alǵysyn bildirgen Qazaqstan Respýblıkasy Prezıdentiniń keńesshisi Maqsat Sqaqov otbasynyń beriktigin saqtaýda óziniń ómirlik tájirıbesimen bólisti.
Forýmnyń «Áke – qoǵamnyń rýhanı jańǵyrýyndaǵy mańyzdy áleýmettik ınstıtýt» plenarlyq sessııasynda Qazaqstan Respýblıkasynyń Aqparat jáne qoǵamdyq damý vıtse-mınıstri Danııar Esın «Qazaqstandaǵy otbasy ınstıtýtynyń damýy: máseleleri men keleshegi», Qazaqstan Respýblıkasynyń Bilim jáne ǵylym mınıstrligi Balalar quqyqtaryn qorǵaý komıteti tóraǵasynyń orynbasary Dýlat Jekebaev «Balanyń ózin-ózi damytý múmkindigin qamtamasyz etý – jańa jaǵdaıda otbasy men mekteptiń ózara is-qımylynyń mańyzdy máselesi», «Rýhanı jańǵyrý» ortalyǵynyń dırektor Ǵalymjan Qusmanǵalı «Uly Abaıdyń tárbıe taǵylymdary jáne bala tárbıesindegi ákeniń róli», «BTS Digital» bilim berý jobalarynyń jetekshisi, saıasattanýshy Saıasat Nurbek «Otbasynyń balalardyń qabiletterin damytýǵa áseri», «Ákeler odaǵy» QB tóraǵasy Berik Raqyshev «Qazaqstanda ákeler qoǵamdyq qozǵalysyn damytý týraly» taqyryptarynda áńgime órbitti.
Forým aıasynda qatysýshylar Reseı Federatsııasynyń «Soıýz ottsov» ortalyq komıtetiniń múshesi Vladımır Anısımov, BUU Damý baǵdarlamasynyń Qazaqstandaǵy turaqty ókiliniń orynbasary Vıtalıı Vremısh usynǵan jumys tájirıbelerimen tanysty. Іs-sharanyń sońynda úzdik úlgili ákeler Qazaqstan Respýblıkasy Prezıdentiniń janyndaǵy Áıelder isteri jáne otbasylyq-demografııalyq saıasat jónindegi Ulttyq komıssııanyń Alǵys hatymen marapattaldy. «Áke – otbasynyń tiregi» 4-shi respýblıkalyq ákeler forýmynyń rezolıýtsııasy qabyldandy.
