Respýblıkalyq Abaı oqýlarynda 56 oqýshy jeńimpaz atandy

SEMEI. QazAqparat - Álemdik deńgeıdegi oıshyl, ult rýhanııaty Abaı Qunanbaıulynyń týǵan kúni qarsańynda ótken XXIV Respýblıkalyq Abaı oqýlary óz máresine jetti, dep habarlaıdy QazAqparat.

Saıys qorytyndysy boıynsha Oqý-aǵartý mınıstrliginiń dıplomdarymen 56 oqýshy marapattaldy. Onyń ishinde birinshi dárejeli dıplommen 13 qatysýshy marapattalsa, ekinshi dárejeli dıplomdy 19 qatysýshy ıelendi. Úshinshi dárejeli dıplomdy 24 qatysýshy enshiledi.

Sonymen qatar, qazylar alqasy úzdik komandalardy anyqtady. Bas júldeni Shyǵys Qazaqstan oblysy jeńip alsa, birinshi oryndy Abaı oblysynyń, ekinshi oryndy Qaraǵandy oblysynyń komandalary ózara bólisti. Úshinshi oryn Aqmola, Aqtóbe, Jambyl, Pavlodar oblystarynan kelgen komandalar ıelendi.

Esterińizge salsaq, HHIV respýblıkalyq Abaı oqýlary Oqý-aǵartý mınıstrliginiń qoldaýymen Abaı oblysynyń «Abaı jáne Shákárim» memorıaldyq kesheninde ótti. Baıqaýǵa respýblıka boıynsha 23 komanda, 130-dan astam jas abaıtanýshylar qatysty. Abaı oqýlaryna qatysqan jas talanttar 6 nomınatsııa boıynsha óz baqtaryn synady.