Respýblıkalyq joldarda úsh kún ishinde zańsyz nómir taqqan 900-den astam kólik anyqtalǵan
ASTANA. KAZIFORM - Zańsyzdyqtar kólik prokýratýrasy organdarynyń, polıtsııanyń, kólik baqylaý ınspektsııasynyń jáne «QazAvtoJol» AQ-nyń birlesken kúshimen, 8-10 qańtar aralyǵynda júrgizilgen saýyqtyrý sharasy barysynda anyqtalǵan.
Bas kólik prokýratýrasy baspasóz qyzmetiniń habarlaýynsha, atalǵan shara jalǵan memlekettik tirkeý nómirlik belgilerin paıdalaný faktileriniń jolyn kesýge baǵyttalǵan.
- Іs-shara barysynda eldiń respýblıkalyq mańyzy bar avtomobıl joldarynda jalǵan, qoldan jasalǵan nemese oqylmaıtyn memlekettik tirkeý nómirlik belgileri bar kólik quraldaryn basqarýdyń 900-den astam faktisi anyqtaldy. Anyqtalǵan barlyq faktiler boıynsha júrgizýshilerge qatysty ákimshilik yqpal etý sharalary qabyldanyp, onyń ishinde aıyppul salý, sondaı-aq sot sheshimderine sáıkes ózge de jaýaptylyq sharalary qoldanyldy, - delingen habarlamada.
Taldaý kórsetkendeı, júrgizýshiler jalǵan nómirlik belgilerdi kóbinese aqyly avtomobıl joldarymen júrip ótkeni úshin tólem jasaýdan jaltarý, belgilengen jyldamdyq shekteýlerin asyrý, sondaı-aq salmaq-gabarıttik baqylaýdan ótý kezinde júk kólikteriniń naqty salmaǵyn jasyrý maqsatynda paıdalanady.
Sonymen qatar, ótken jyldyń qorytyndysy boıynsha el aýmaǵynda jalǵan memlekettik tirkeý nómirlik belgilerin paıdalaný boıynsha 40 myńnan astam fakt anyqtalǵan.
Prokýratýra organdary mundaı quqyq buzýshylyqtar jol qozǵalysy qaýipsizdigine qater tóndirip, jol-kólik oqıǵalarynyń týyndaýyna yqpal etetinin atap ótedi. Bul baǵyttaǵy jumystar jalǵasa bermek.
Osyǵan deıin Qyzylordada bir kúnde eki kólik urlaǵan kúdikti ustalǵany týraly jazdyq.