Respýblıkalyq joldarda «Halyqtyq baqylaý» jobasy iske qosylady

ASTANA. KAZINFORM — Respýblıkalyq mańyzy bar avtomobıl joldarynyń sapasyn tekserý boıynsha «Halyqtyq baqylaý» jobasy iske qosylady. Bul týraly «QazAvtoJol» UK» AQ basqarma tóraǵasy Darhan Imanashev aıtty.

— 2025 jylǵy 1 mamyrdan bastap respýblıkalyq mańyzy bar avtomobıl joldarynyń sapasyn tekserý boıynsha keń aýqymdy «Halyqtyq baqylaý» jobasy iske qosylady. Jobanyń maqsaty — elimizdiń árbir azamaty salynyp jatqan respýblıkalyq mańyzy bar avtomobıl joldary boıynsha qoǵamdyq baqylaýǵa shaqyrý. «QazAvtoJol» ulttyq kompanııasy óz kezeginde anyqtalǵan kemshilikter men máselelerge den qoıyp, ony qysqa merzimde sheshýdi qamtamasyz etpek. Jobaǵa qatysý úshin 1403 baılanys ortalyǵyna habarlasyp, ótinim qaldyrý kerek. Nysandardy aralaý kestesin «QazAvtoJol» ulttyq kompanııasynyń www.qaj.kz resmı saıtynan kórýge bolady, — dedi ol Ortalyq kommýnıkatsııalar qyzmetindegi brıfıngte.

Bıyl 8 800 shaqyrym jolda túrli jóndeý jumystaryn júrgizý úshin 781 mlrd teńge qarastyrylǵan. 

Sonymen qatar shekaradaǵy 6 avtomobıl ótkizý pýnktinde qurylys-montajdaý jumystary júrgizilip, 22 janarmaı quıý stantsııasy (JQS) jáne 14 kafe salý, jol paıdalanýshylarǵa qolaıly jaǵdaı jasaý maqsatynda týrıstik nysandarǵa aparatyn baǵyttarǵa 37 jańa sanıtarlyq torap ornatý josparlanǵan.