Respýblıkalyq joldarda aýqymdy jóndeý júrip jatyr: bıyl 124 nysan qamtyldy
ASTANA. KAZINFORM - 2026 jylǵy jol-qurylys maýsymy bastalǵaly beri Qazaqstanda respýblıkalyq mańyzy bar avtomobıl joldaryn kúrdeli jəne ortasha jóndeý jumystary qarqyndy júrgizilip jatyr, dep habarlaıdy QR Kólik mınıstrliginiń baspasóz qyzmeti.
Bıylǵy maýsymnyń basty ereksheligi - jol tóseminiń negizinen bastap ústińgi qabatyna deıingi konstrýktıvti qabattardy kezeń-kezeńimen tóseýge basa mən berilýinde. Bul bolashaq avtojoldardyń sapasy men uzaq jyldar boıy shydas berýiniń basty kepili bolmaq.
-2026 jyly kúrdeli jóndeý aıasynda 25 nysan boıynsha jalpy 321 km avtomobıl joldary qamtyldy, olardyń 19-y ótken jyldan ótpeli, al 6-ýy jańa nysandar bolyp tabylady. Maýsym basynan beri negizgi jumystar jol jamylǵysynyń konstrýktıvtik qabattaryn salýǵa shoǵyrlanǵan. Josparlanyp, oryndalǵan jumystar aıasynda 231 km-de negizdiń tómengi qabaty, 190 km-de negizdiń joǵarǵy qabaty, 230 km-de jabynnyń tómengi qabaty jáne 78 km-de jabynnyń joǵarǵy qabaty salý jumystary atqarylyp jatyr, - delingen habarlamada.
Sonymen qatar bıyl 124 nysan quramynda 69 ótpeli jáne 55 jańa ýchaskeni qamtıtyn jalpy 3,7 myń km avtomobıl joldarynda ortasha jóndeý jumystary júrgizilip jatyr. Bul jumystar sheńberinde de negizgi kólem jol jamylǵysynyń konstrýktıvtik qabattaryn salýǵa tıesili: maýsym basynan beri josparlanyp, negiz qabatyn salý jumystary júrgizilý ústinde — 1,1 myń km-de, jabynnyń tómengi qabaty — 1,8 myń km-de, al jabynnyń joǵarǵy qabaty — 2,4 myń km-de oryndaldy.
Osyǵan deıin Astana áýejaıy aýmaǵynda jol jóndeý jumystary bastalǵany týraly jazdyq.
