Respýblıkalyq joldarda ár shaqyrym saıyn kamera ornatylyp jatyr
ASTANA. KAZINFORM — Elimizdiń joldaryndaǵy qaýipsizdikti 300 dron qadaǵalaıdy. Bul týraly Úkimet otyrysynan keıingi baspasóz máslıhatynda Іshki ister mınıstriniń orynbasary Igor Lepeha aıtty.
— Ótken jyly jol-kólik oqıǵalarynyń sany 14 paıyzǵa óskeni esterińizde shyǵar. Bul — jyl qorytyndysyndaǵy sońǵy kórsetkish. Al bastapqyda, birinshi toqsanda bul kórsetkish áldeqaıda joǵary bolǵan edi. Jaraqat alǵandar sany boıynsha ósim 20 paıyz boldy. Al qazirgi ýaqytta úsh kórsetkishtiń barlyǵy boıynsha tómendeýge qol jetkizdik. Bul rette avtoparkimiz de ósip keledi. Qazirgi tańda bizde 6 mln 100 myń kólik bar. Sońǵy bes jylda olardyń sany 1 mıllıonnan astamǵa artty. Halyqaralyq kólik aǵyny da aıtarlyqtaı ósti. Ótken jyly Qazaqstan arqyly 3 mıllıon kólik ótkenin aıtqan edik. Biraq bul kórsetkish óte shartty, sebebi naqty esep júrgizetin júıe joq. Al bıyl el aýmaǵy arqyly keminde 5 mıllıon sheteldik kólik ótti dep aıtýǵa qoryqpaımyn, — dedi mınıstr orynbasary.
Onyń aıtýynsha, qazirgi ýaqytta «QazAvtoJol» kameralardy is júzinde árbir shaqyrym saıyn ornatyp jatyr. Demek, kameralar joldaǵy jaǵdaıdy is júzinde ár shaqyrym saıyn baqylap otyrady. Munan bólek, 500 mobıldi keshen bar. Olar jyldamdyqty ólsheıdi jáne jol qozǵalysy erejeleriniń basqa da buzýshylyqtaryn anyqtaıdy.
— Kólikpen kele jatqanda aldyńyzdan osyndaı kesheni bar kólik kezdesýi múmkin. Ol toqtatpaıdy, biraq siz jasaǵan quqyq buzýshylyqtardy tirkeıdi. Joldarda drondardy qoldana bastadyq. Qazirgi tańda joldarda shamamen 300 dron paıdalanylady. Ol qarsy jolaqqa shyǵý, basqa kóliktiń aldynan kesip ótý, basyp ozý jáne basqa da osyndaı quqyq buzýshylyqtardy anyqtaýǵa múmkindik beredi, — dedi Igor Lepeha.
Mınıstr orynbasarynyń dereginshe, qazirgi ýaqytta ákimshilik quqyq buzýshylyqtardyń 67 paıyzy tehnıkalyq tirkeý quraldarynyń kómegimen anyqtalady.
— Demek, adamnyń aralasýy bolmaǵandyqtan sybaılas jemqorlyq joq. Keıbir óńirlerde bul kórsetkish 70 paıyzdan asady, — dedi ol.
Aıta keteıik, jol erejesin óreskel buzatyndar júrgizýshi kýáliginen 1 jylǵa aıyrylýy múmkin.
