Respýblıkalyq medıtsınalyq-sanıtarlyq alǵashqy kómek ortalyǵynyń basshysy taǵaıyndaldy
QYZYLORDA. KAZINFORM — Respýblıkalyq medıtsınalyq-sanıtarlyq alǵashqy kómek ortalyǵynyń jańa basshysy bolyp Oljas Ysqaqov taǵaıyndaldy. Bul týraly Densaýlyq saqtaý mınıstrliginiń baspasóz qyzmeti habarlady.
Oljas Ermekuly 1988 jyly Qyzylorda qalasynda dúnıege kelgen.
— Qyzylorda medıtsınalyq kolledji men S. Asfendııarov atyndaǵy Qazaq ulttyq medıtsına ýnıversıtetin bitirgen. 2012-2013 jyldary Ońtústik Qazaqstan memlekettik farmatsevtıka akademııasynda emdeý isi mamandyǵy boıynsha ınternatýradan ótken. Odan bólek, Qaztutyný odaǵy ekonomıkalyq ýnıversıtetin ekonomıka salasyndaǵy quqyqtyq retteý mamandyqtary boıynsha bitirgen. Densaýlyq saqtaý salasyndaǵy menedjment magıstri. Búgingi kúni Almaty menedjment ýnıversıtetinde doktorantýra boıynsha bilimin jetildirip jatyr, — delingen habarlamada.
Eńbek jolyn 2013-2014 jyldar aralyǵynda Qyzylorda qalalyq № 3 emhanasynyń aımaqtyq terapevt dárigeri bolyp bastaǵan. 2014-2016 jyldar aralyǵynda № 3 qalalyq emhanada bólim meńgerýshisi, 2016-2018 jyldary osy emhanada bas dárigerdiń emdeý isi jónindegi orynbasary, 2018 jyldyń aqpan aıy men qyrkúıek aıy aralyǵynda Qyzylorda oblystyq densaýlyq saqtaý basqarmasynyń medıtsınalyq kómekti uıymdastyrý bóliminiń basshysy, 2018-2021 jyl aralyǵynda Qyzylorda oblysynyń densaýlyq saqtaý basqarmasy basshysynyń emdeý, aldyn alý jumystary jónindegi, 2021-2023 jyldary Densaýlyq saqtaý mınıstrligi ana men bala densaýlyǵyn saqtaý departamentiniń basqarma basshysy, departament dırektorynyń orynbasary qyzmetterin atqarǵan.
2023 jyldan bastap búginge deıin Qyzylorda oblystyq densaýlyq saqtaý basqarmasynyń basshysy qyzmetin atqardy.
Aıta keteıik, ótken aptada elimizdiń memlekettik basqarý júıesinde jáne jergilikti atqarý organdarynda mańyzdy kadrlyq aýys-túıis boldy.
