Respýblıkalyq mańyzy bar taǵy bir jol aýqymdy jóndeý jumystarymen qamtylmaq
ASTANA. KAZINFORM — Jalpy uzyndyǵy 954 shaqyrymdy quraıtyn «Jezqazǵan — Petropavl» joly Qazaqstannyń tórt óńiri arqyly ótedi (SQO, Qostanaı, Aqmola, Ulytaý óńirleri).
Uzyndyǵy 359 shaqyrymdy quraıtyn ýchaske Soltústik Qazaqstan oblysynda ornalasqan. Dál osy óńirde aýqymdy jóndeý jumystary atqarylýda. 2025 jyldyń sońyna deıin 300 shaqyrym jol jóndeledi.
— Qazirgi ýaqytta óńirde «Jezqazǵan — Petropavl» jolynyń 83 shaqyrymynda jumystar aıaqtalýda. Atap aıtqanda, Nıkolaevka jáne Pokrovka aýyldary arasyndaǵy 40 shaqyrymdyq ýchaskeni qosa alǵanda, Lomonosovka jáne Stavropolka, Toqsan bı jáne Novoıshımka aýyldary arasyndaǵy 43 shaqyrymda jańa asfalt tóseldi. 2025 jyly taǵy 215 shaqyrym jóndeledi, — dep atap ótti mınıstrlik.
Beskól aýyly men Pokrovka aýyly arasyndaǵy 69 shaqyrym, Sergeevka qalasynan Aqmola oblysynyń shekarasyna deıingi jalpy uzyndyǵy 146 shaqyrym jolda jóndeý jumystary ótedi. Sol aralyqtarda qazir sý ótkizý qubyrlaryn aýystyrý jáne qurylys materıaldaryn daıyndaý jumystary júrip jatyr. 2025 jyldyń sońyna deıin joldy ortasha jóndeýden ótkizip qana qoımaı sý tasqynynan zaqymdalǵan 24 sý ótkizý qubyryn aýystyryp, taǵy 72 sý ótkizý qybyry jóndeledi.
SQO-da «Jezqazǵan-Petropavl» jolynyń basym bóliginde ótken ǵasyrdyń 80-jyldarynan bastap aýqymdy jumystar júrgizilgen joq. Tek 2017-2018 jyldary Beskól aýyly men Petropavl qalasy arasyndaǵy ýchaske qaıta jańartyldy jáne 2023 jyly Sergeevka qalasy men Nıkolaevka aýyly arasyndaǵy 51 shaqyrymdyq jol ýchaskesine ortasha jóndeý júrgizildi. Toqsan bı aýylynan Aqmola oblysy Esil aýdanyna barar jol ábden eskirgen.
«Jezqazǵan — Petropavl» avtojolynyń qalǵan úsh óńirden ótetin aralyqtary da jóndeýden ótedi. Máselen, 2025 jyldyń sońyna deıin Aqmola oblysynda 113 shaqyrym, Ulytaý oblysynda 109 shaqyrym, Qostanaı oblysynda 71 shaqyrym jol jóndeledi.
Demek, joldyń basym bóligi jańartylyp, halyq ıgiligine berilmek.
Buǵan deıin «Merki-Býrylbaıtal» avtojolyn qaıta jańartýǵa qansha qarjy jumsalatyny belgili boldy.
