Respýblıkalyq mańyzy bar «Narynqol-Kegen» joly jóndeledi

ALMATY. KAZINFORM – Jyldar boıy sheshimin tappaı kelgen, Narynqol-Kegen respýblıkalyq kúre joly jóndeýden ótedi. Bul týraly óńirlik kommýnıkatsııalar qyzmetinde ótken baspasóz máslıhaty barysynda Raıymbek aýdanynyń ákimi Berik Dúısenbaev aıtty.

Spıkerdiń sózinshe, 2024 jyly Narynqol-Kegen jolynyń 15 shaqyrymy jóndeldi, qalǵan 74 shaqyrymyna qarajat bólinip, «Qazavtojol» mekemesi kóktem shyǵa jóndeý jumystaryna kirisedi.

– 2025 jyly Raıymbek aýdany tolqytaı ortalyqtandyrylǵan aýyz sýmen qamtylady.Óńirde 20 eldi meken men 11 aýyldyq okrýg bar. Qazir Qarasaz jáne Shalkóde aýyldaryna sý tartý jumystary qolǵa alyndy, jyl sońyna deıin aıaqtalady. Jospar júzege assa, Raıymbek aýdanynda aýyz sýǵa qatysty másele týyndamaıtyn bolady,– deıdi aýdan basshysy Berik Dúısenbaev.

Sondaı-aq ol halyqtyń turmystyq ál-aýqatyn jaqsartý úshin, aımaqta baǵany turaqtandyrýǵa qatysty jumystar júrgizilip jatqanyn atap ótti.

– Egin sharýashylyǵymen aınalysatyn «Raıymbek NAN» men «Altyn Dán» JShS-i aýdan turǵyndaryna undy arzanǵa satady. Bul naryq baǵasynan 3-4 myń teńgege tómen jáne halyqqa tıimdi, – deıdi aýdan ákimi.

Eske salaıyq, buǵan deıin 2025 jyly Almaty oblysynda 400 shaqyrymnan astam respýblıkalyq avtojol jóndeletini týraly jazǵan edik. 

«QazAvtoJol» UK» málimetine sáıkes, jol ýchaskelerin jóndeýge 30 mlrd teńge bólinedi.

Sondaı-aq oblys boıynsha shamadan tys júk tasymaldaıtyn kólikter jol tósemine zııan keltirmeýi úshin jergilikti avtomobıl joldaryna 2 avtomattandyrylǵan ólsheý stantsııalary ornatylǵan. Aldaǵy ýaqytta taǵy úsheýi qoıylmaq.