Respýblıkalyq mańyzdaǵy joldyń bárine mal ótpeıtin qorshaý ornatylýy múmkin

ASTANA. KAZINFORM — Aýyl sharýashylyǵy mınıstriniń orynbasary Amanǵalı Berdalın ortalyq kommýnıkatsııalar qyzmetinde ótken baspasóz máslıhatynda turǵyndardan respýblıkalyq joldardy mal kirmeıtindeı qorshaý ornatý týraly ótinish kóp túsip jatqanyn aıtty.

— Jol boıyndaǵy maldy kólik apatynan qorǵaý úshin shetin qorshaý kerektigi kópten beri aıtylyp keledi. Qazir ondaı qorshaý tek І sanattaǵy respýblıkalyq mańyzdaǵy joldarǵa ǵana ornatylady eken. «QazAvtoJol» kompanııasyna Aýyl sharýashylyǵy mınıstrligi búkil respýblıkalyq mańyzdy joldarǵa mal ótpeıtin qorshaý ornatý týraly ótinish jasaı ala ma, — dep surady jýrnalıst.

Vıtse-mınıstr bul bastamany qoldaýǵa ázir ekenin aıtty.

— Mundaı máseleniń bárin aýyl sharýashylyǵy mınıstrligi qoldaıdy. Ózińizge de osyndaı másele kóterip otyrǵanyńyz úshin rahmet. Óıtkeni bul qazir halyq kóp kóterip júrgen negizgi taqyryptyń biri. Biz jergilikti ákimdikter bar, óz tarapymyzdan da, bárimiz birge jumys isteýimiz kerek dep oılaımyn, — dedi Amanǵalı Berdalın.

Buǵan deıin Qazaqstan eksporttaı alatyn sıyr etiniń lımıti bekitilgenin jazǵan edik.