Respýblıkalyq bıýdjettiń kiris bóligi tolyq oryndalmaı jatyr - Prezıdent

ASTANA. KAZINFORM - Memleket basshysy Qasym-Jomart Toqaev máslıhattardyń jergilikti ekonomıkalyq saıasatqa yqpalyn arttyra túsý máselesine aıryqsha nazar aýdarý kerektigin aıtty.

«Qazir jańa Bıýdjet jáne Salyq kodeksteri ázirlenip jatyr. Onda jergilikti ózin-ózi basqarýǵa qatysty reformanyń erekshelikteri eskerilýge tıis. Úkimet aýyl ákimderiniń bıýdjetin qalyptastyrý jáne ony jumsaý tásilderin qaıta qaraýy kerek. Jergilikti ózin-ózi basqarý júıesiniń qarjylyq derbestigin arttyrý úshin naqty usynystar ázirleýi qajet. Kodeks jobalaryn talqylaýǵa máslıhattar belsene qatysqany jón. Jergilikti bıýdjet qarjysynyń durys ári tıimdi bólinýi óte mańyzdy. Depýtattar bul máselege zor jaýapkershilikpen qaraýǵa tıis. Máslıhattar bıýdjet saıasatyn, túrli tólemderdiń shekti mólsherin, eldi mekenderdi abattandyrý jaıyn, basqa da máselelerdi udaıy baqylaýda ustaýy qajet», — dedi Prezıdent.

Ol qazir respýblıkalyq bıýdjettiń kiris bóligi tolyq oryndalmaı jatqanyn atap ótti.

«Men Joldaýda Úkimet pen Ulttyq bankke osyǵan qatysty naqty sharalar qabyldaýdy tapsyrdym. Sebebi, bul — jalpyulttyq mindet. Oǵan barlyq deńgeıdegi bılik tarmaqtary kúsh jumyldyrýǵa tıis.

Biz «Qýatty aımaqtar — qýatty el» qaǵıdatyna saı jumys isteýimiz kerek. Sizder munyń mańyzy zor ekenin jaqsy bilesizder. Sondyqtan ár depýtat óz aýdanyn órkendetýge atsalysady dep senemin», — dedi Qasym-Jomart Kemeluly.