Respýblıkalyq bıýdjetten bólingen 207 mln teńge tıimsiz jumsalǵan – Aýdıtorlyq palata

ASTANA. KAZINFORM — Joǵary aýdıtorlyq palatanyń nusqamasy boıynsha jylýmen, sýmen jabdyqtaý jáne sý burý júıeleriniń qurylysyn jańǵyrtý kezindegi bıýdjet qarajatyn utymsyz jumsaý toqtatyldy. 

Osy salaǵa aýdıt júrgizý barysynda mynadaı zań buzý anyqtalǵan. 

— 2023-2024 jyldary senim bildirilgen agenttiń shyǵyndary sheńberinde bıýdjet qarajatynan taldamalyq kórsetiletin qyzmetterge aqy tólengen. Al bul Qurylys jáne turǵyn úı-kommýnaldyq sharýashylyq isteri komıteti men «Qazaqstandyq turǵy úı-kommýnaldyq sharýashylyqty jańǵyrtý jáne damytý ortalyǵy» AQ-nyń tikeleı fýnktsıonaly. Jalpy 2 jyl ishinde 207 mln teńgeden astam qarajat jumsalǵan. Joǵary aýdıtorlyq palatanyń tapsyrmasyn oryndaý sheńberinde jylýmen, sýmen jabdyqtaý jáne sý burý júıeleriniń qurylysyn jańǵyrtýǵa respýblıkalyq bıýdjetten shyǵystardy qalyptastyrý kezinde 2025 jyldan bastap atalǵan qyzmetter úshin qarjylandyrý bólinbeıdi, — delingen Joǵary aýdıtorlyq palatanyń habarlamasynda.

Sonymen qatar 2024 jylǵa arnalǵan bıýdjetti túzetý kezinde 84,4 mln teńge únemdeldi. Bul qarajat memleket qazynasyna qaıtaryldy.

Memlekettik aýdıt qorytyndylary boıynsha basqa da tapsyrmalardyń oryndalýy Joǵary aýdıtorlyq palatanyń baqylaýynda bolady.

Aıta ketelik Álıhan Smaıylov Prezıdentke esep bergen kezde bıýdjetke 135 mlrd teńge qaıtarylǵany týraly aıtqan edi.