Respýblıkalyq aqyndar aıtysynyń bas júldegerine Astanadan páter berildi
ASTANA. KAZINFORM – Erkeǵalı Rahmadıev atyndaǵy memlekettik akademııalyq fılarmonııa zalynda «Adamzattyń bárin súı!» atty respýblıkalyq aqyndar aıtysy ótti.
14 aqyn baq synasqan jyr dodasynyń ashylý saltanatyna QR Mádenıet jáne aqparat vıtse-mınıstri Aıbek Sydyqov qatysyp, mınıstr Aıda Balaevanyń quttyqtaý hatyn oqyp berdi.
– Aıtys – halqymyzdyń rýhanı bolmysynyń aınasy, ǵasyrlardan jetken qasıetti óner. Ony qasterleý, jańa dáýirdiń tynysymen qaıta túletý jáne jas urpaqtyń sanasyna sińirý – bárimizge ortaq mindet. Mádenıet jáne aqparat mınıstrligi jyl saıyn ulttyq ónerdi dáripteıtin, dástúr sabaqtastyǵyn jalǵaıtyn osyndaı irgeli jobalardy júıeli túrde júzege asyryp keledi. Elimizdiń ıgilikteri men jetistikteri, halyqtyń jarqyn bolashaǵy ult mereıin asqaqtatatyn ulyq merekege arnalyp otyrǵan búgingi aıtystyń arqaýyna aınalyp, aqyndarymyzdyń shabyty shalqı bersin, - delingen quttyqtaý hatta.
Іs-sharany Qazaqstannyń eńbek sińirgen qaıratkeri Amanjol Áltaı júrgizip, qazylar alqasyna Qazaqstannyń eńbek sińirgen qaıratkeri, «Otan» ordeniniń ıegeri Júrsin Erman tóraǵalyq etti.
Eki kúnge sozylǵan jyldyń qorytyndy aıtysynyń bas júldegeri jáne «Altyn dombyra» ıegeri atanǵan Aıbek Qalıevke Astana qalasynan páter tabystaldy.
Birinshi oryndy Beksultan Orynbasar, ekinshi oryndy Nurbol Jaýynbaev pen Serik Qýanǵan, al úshinshi oryndy Meıirbek Sultanhan men Dıdar Qamı ıelendi. Mádenıet jáne aqparat mınıstrliginiń baspasóz qyzmeti aqtyq synda erekshe sóz sheberligin kórsetken aqyndar arnaıy júldemen marapattalǵanyn atap ótti.
Aıta keteıik, «Adamzattyń Abaıy» respýblıkalyq aqyndar aıtysynda Maqsat Aqanov jeńimpaz atandy.