Respýblıkaǵa tanymal aıtys aqyny Sholpan Qydyrnııazova ómirden ozdy
ORAL. KAZINFORM – "Qurmet" ordeniniń ıegeri, Qazaqstannyń eńbek sińirgen mádenıet qyzmetkeri, aıtysker aqyn, qoǵam qaıratkeri Sholpan Batyrqyzy Qydyrnııazova 76 jasqa qaraǵan shaǵynda dúnıeden ótti.
BQO halyq shyǵarmashylyǵy ortalyǵynan málim etkenindeı, Sholpan Qydyrnııazova 1949 jyly 6 mamyrda Qaratóbe aýdany Qarakól aýylynda dúnıege kelgen.
Ol 1956-1966 jyldar aralyǵynda Alakól bastaýysh, Muhıt atyndaǵy Qaratóbe orta mektepterinde oqyp, bilim alǵan. Qaratóbe aýdandyq «Eńbek týy» gazetinde ádebı qyzmetker bolyp jumys istedi. 1967-1971 jyldary A.S.Pýshkın atyndaǵy Oral pedagogıkalyq ınstıtýtynda oqyp, qazaq tili men ádebıetiniń muǵalimi mamandyǵyn aldy.1971-1976 jyldarda Qaratóbe aýdany Shóptikól segizjyldyq mektebinde muǵalim, mektep dırektorynyń oqý isi jónindegi orynbasary boldy. 1976-1983 jyldary «Eńbek týy» gazetinde radıohabar uıymdastyrýshy tilshi, jaýapty hatshy, 1983-1993 jyldary halyq depýtattary aýdandyq keńes atqarý komıteti uıymdastyrý bóliminiń meńgerýshisi, jaýapty hatshy, tóraǵa orynbasary, aýdan ákimi orynbasary mindetterin atqardy, birneshe dúrkin aýdandyq keńeske depýtattyqqa saılandy.
Sholpan Batyrqyzy 2004-2008 jyldary jańadan ashylǵan Batys Qazaqstan oblysy tilderdi damytý basqarmasynyń bastyǵy bolyp qyzmet etip, óńirde memlekettik til men onomastıka salasynyń damýyna súbeli úlesin qosty.
Sh. Qydyrnııazova elimizge aıtysker aqyn retinde keńinen tanyldy. Ásirese, 1980 jyly respýblıkalyq ekinshi aqyndar aıtysynda birinshi orynǵa ıe bolyp, oǵan Qazaq SSR-iniń eńbek sińirgen mádenıet qyzmetkeri ataǵy berildi.
Qaratóbe aýdanynda qoǵamdyq negizde «Jas aqyndar» mektebiniń negizin qalady. Ózi túrli deńgeıdegi elýden asa aıtysqa qatysyp, kóptegen aqyndarmen aıtysqan. Aıtystary «Jyr shashý», «On alty qyz, bir jigit» jınaqtaryna engen. Aıtys sahnasynan keıingi ýaqyttarda óleń, túıinsóz jazýmen aınalysyp, «Jazıra» (1982 jyl), «Erke qus» (1992), «Eligi erkin dalanyń...» (2004), «Qos qanat» (2010), «Qaratóbem, qasıetti qushaǵyń» (2015), «Meniń tárbıe saǵatym» (2016), «Anadan – aqyl, ájeden – ádep» (2019) jyr, aıtys, naqyldar jınaqtary jaryq kórdi.
«Qazaqstan Konstıtýtsııasyna - 10 jyl», «Qazaqstan máslıhatyna - 20 jyl», «Eren eńbegi úshin» medaldarynyń, «Qurmet» ordeniniń ıegeri, Qaratóbe aýdanynyń qurmetti azamaty.
Eske sala keteıik, budan buryn Sholpan Qydyrnızovanyń yqpaldasqannyń yrysy mol ekendigi týraly aıtqanyn jazǵan bolatynbyz.