Respýblıkadaǵy órtterdiń basym bóligi TJM bólimsheleri joq shalǵaı aýmaqtarda bolady
NUR-SULTAN. QazAqparat - Eldi meken aýmaqtarynda qurǵaq shópterdiń órtenýi asa alańdatady. Bul týraly Ortalyq kommýnıkatsııalar qyzmetinde ótken brıfıngide QR Tótenshe jaǵdaılar mınıstrliginiń Órtke qarsy qyzmet komıtetiniń tóraǵasy Nurbolat Derbisov aıtty, dep habarlaıdy QazAqparat tilshisi.
«Eldi meken aýmaqtarynda qurǵaq shópterdiń órtenýi alańdatady, óıtkeni onyń jalyny turǵyndardyń aýmaǵyna ótip ketý qaýpi bar. 2021 jylǵy 26 sáýir men 3 mamyr aralyǵynda qurǵaq shóptiń órtenýi turǵyn úılerge, jazǵy saýyqtyrý lagerleriniń ǵımarattaryna, saıajaı jáne sharýashylyq qurylystaryna taralýynyń 4 jaǵdaıy tirkeldi», - deıdi Órtke qarsy qyzmet komıtetiniń tóraǵasy Nurbolat Derbisov.
Onyń aıtýynsha, bıyl 1-2 mamyrda Pavlodar qalasynda baý-baqsha jáne saıajaı aýmaqtarynda qurǵaq shóptiń janýynyń 2 oqıǵasy tirkeldi.
«Nátıjesinde 5 saıajaı tolyǵymen joıylyp, 7 saıajaı jartylaı zaqymdaldy. Bıylǵy jylǵy 2 mamyrda Soltústik Qazaqstan oblysynyń Jelıakovo aýylynda qurǵaq shóp órtenip, keıin jalyn jeke turǵyn úı sektoryndaǵy 6 úıge taraldy, sol kúni Qyzyljar aýdanyndaǵy «Sosnovyı bor» balalar saýyqtyrý lageriniń aýmaǵynda qurǵaq shóp órtenip, keıinnen jalyn demalýshylar turatyn korpýsqa ótti. 2 mamyrda Nur-Sultan qalasyndaǵy Saryarqa aýdanynda qurǵaq shóp órtenip, jalyn turǵyn úıge taralǵan, sondaı-aq órttiń saldarynan jeńil avtokólik janyp ketti», - deıdi ol.
Aıta ketý kerek, orman jáne dala órtteriniń kóp bóligi 100 km-den astam radıýsta, TJM bólimsheleri joq shalǵaı aýmaqtarda oryn alady.
