Respýblıkadaǵy memlekettik tildi úıretý ortalyqtarynyń jumysyn úılestirýde birizdilik jetispeıdi - Sh. Qurmanbaıuly
ASTANA. 21 qazan. QazAqparat /Qanat Mámetqazyuly/ - Respýblıkamyzda memlekettik tildi úıretýdiń 101 ortalyǵy bar.
Olardyń sany áli de artyp keledi. Alaıda osy ortalyqtardyń jumysyn úılestirýde birizdilik jetispeıdi. Búgin Astanada «Respýblıkadaǵy memlekettik tildi úıretý ortalyqtarynyń jumysyn júıege túsirýdiń uıymdastyrýshylyq jáne ádistemelik máseleleri» taqyrybynda ótken ǵylymı-praktıkalyq konferentsııa barysynda Til komıtetiniń tóraǵasy Sherýbaı Qurmanbaıuly osylaı málimdedi.
«Respýblıka óńirlerinen Til komıtetine birqatar hattar joldandy. Onda ortalyqtardyń quqyqtyq mártebesin aıqyndaý máseleleri de kóterilip otyr. Onyń ústine qazirgi qoldanystaǵy ortalyqtyń biri qazynalyq mekeme bolsa, ekinshisi jaýapkershiligi shekteýli seriktestik endi biri aktsıonerlik qoǵam bolyp otyr. Endeshe olardyń qalyptasý formasynan bastap jumysty úılestirýge qatysty mindetter shash etekten», - deıdi Til komıtetiniń tóraǵasy Sherýbaı Qurmanbaıuly.
Sonymen qatar tóraǵa memlekettik tildi oqytýdyń ádisnamasyn jetildirý men standarttaý úshin birqatar is-sharalardy júzege asyrý josparlanǵanyn atap ótti. «Máselen, oqytýdyń standarttary negizinde jańa ádistemelerdi turaqty túrde ázirleý qajet. Qazaq tilin oqytýshylardyń ózderin jańa talaptar deńgeıinde oqytyp, biliktiligin arttyrý mańyzdy. Úshinshiden, memlekettik tildi oqytý júıesinde qashyqtyqtan oqytý ádisin engizý. Bul álem elderindegi til oqytýda keń taraǵan ádis bolsa da, bizde memlekettik tildi oqytý baǵytynda jolǵa qoıylmaı keledi. Budan bólek, memlekettik tildi oqytýdyń ınfraqurylymyn damytý baǵytynda da is-sharalar kózdeledi. Sonymen qatar qazaq tilin oqytý ortalyqtarynyń akkredıttelgen jelisin qurý boıynsha da jumys bastalyp ketti», - deıdi Sh. Qurmanbaıuly. Tóraǵanyń aıtýynsha, aldaǵy ýaqytta memlekettik tildi oqytý ortalyqtarynyń bilim berý qyzmetine mindetti talaptar engiziletin bolady. Ortalyqtyń quqyqtyq bazasy jetilip, olardyń jumysyn reıtıngtik baǵalaý júıesin engizý de kózdeledi. «Ortalyqtar reıtıngisin jasaý úshin ondaǵy tyńdaýshylardan «Qaztest» baǵdarlamasy boıynsha emtıhan tapsyrý qamtamasyz etiledi», - deıdi Sh. Qurmanbaıuly.
