Respýblıkadaǵy árbir 5-shi sport nysany jóndeýdi qajet etedi - Týrızm jáne sport vıtse-mınıstri
TANA. 24 tamyz. QazAqparat /Aıdar Ospanalıev/ - «Sportpen aınalysýdyń buqaralyq sıpat alýyna kedergi bolyp otyrǵan basty máselelerdiń biri sporttyq nysandar men qurylǵylardyń azdyǵy. Bul másele ásirese aýyldyq aımaqtarda erekshe ózekti bolyp otyr»,-
dedi Týrızm jáne sport vıtse - mınıstri Murat Omarov. Bul týraly ol búgin Premer-Mınıstrdiń orynbasary Erbol Orynbaev basqaratyn Densaýlyq saqtaý jónindegi úılestirý keńesiniń XV májilisinde aıtty.
Onyń sózine qaraǵanda, aýyldyq aımaqtardaǵy sport ǵımarattary óte az. Sonymen qatar olar qajetti qurylǵylarmen tolyq qamtamasyz etilmegen jáne ornalasý jaǵynan da árkelki. «Osy ýaqytta turǵyndarǵa qyzmet etip turǵan sporttyq ǵımarattar respýblıka halqynyń 30 paıyzynyń ǵana qajettilikterin qamtamasyz etedi. Sondaı-aq respýblıkadaǵy sportpen aınalysýǵa arnalǵan árbir
5-shi ǵımarat jóndeýdi qajet etedi. Aýyldyq aımaqta ornalasqan 20 myń 160 ǵımarattyń 65 paıyzy ashyq alańdar. Tek 3 paıyzy ǵana jabylatyn sport keshenderi. Olardyń ózi adamdar tyǵyz ornalasqan aýdan ortalyqtarynda ǵana bar»,-deıdi vıtse-mınıstr.
Onyń sózinshe, Aqtóbe, Shyǵys Qazaqstan jáne Jambyl oblystarynyń halyq tyǵyz ornalasqan aýdan ortalyqtarynda sporttyq ǵımarattar múldem joq. «Osy rette sporttyq ınfraqurylymdy damytý úshin «100 mektep, 100 aýrýhana» memlekettik baǵdarlamasynyń aıasynda aldaǵy bes jylda sporttyq jáne densaýlyqty nyǵaıtýǵa baǵyttalǵan keshender salýdy jolǵa qoıýdy usynamyz. Osyǵan deıin bıýdjettik komıssııanyń otyrysyna Týrızm jáne sport mınıstrligi aýyldyq aımaqtarda 16 dene shynyqtyrý jáne sport keshenderin salý úshin qarjy bólý máselesin usyndy. Alaıda bul usynys qabyldanbady»,-dedi mınıstrdiń orynbasary.
Sonymen qatar ol bıýdjet kodeksinde jergilikti bıýdjetten sporttyq qurylǵylardy ustaý máselesin qarastyratyn arnaıy bap joqtyǵy da aýyldyq aımaqta sport nysandaryn salýdy qıyndatyp otyrǵandyǵyn atap kórsetti.
