Respýblıkadaǵy 84 mektep apatty jaǵdaıda
TANA. 16 tamyz. QazAqparat /Marlan Jıembaı/ - Densaýlyq mınıstrligi tekserisiniń nátıjesinde respýblıkadaǵy 84 mekteptiń apatty jaǵdaıda ekendigi anyqtaldy.
Bul týraly búgin Úkimettiń selektorlyq formattaǵy otyrysynda atalǵan vedomstvonyń basshysy Salıdat Qaıyrbekova málim etti.
Memlekettik sanıtarlyq- epıdemıologııalyq qadaǵalaý organdary 1-25 tamyz aralyǵynda el aýmaǵyndaǵy jalpy bilim beretin mektepterdiń 2011-2012 oqý jylyna daıyndyǵyn tekserý júrgizip jatqandyǵyn atap ótken ol: «Aldyn ala málimetter boıynsha, qazirgi tańda 4500 bilim oshaǵynyń daıyndyǵy baǵalandy. Baqylaý nátıjesi boıynsha apatty jaǵdaıda 84 mektep tur. Atap aıtqanda Ońtústik Qazaqstan oblysynda - 36, Jambyl oblysynda - 5, Atyraý, Almaty jáne Soltústik Qazaqstan oblystarynda 2 mektepten apatty jaǵdaıda», - dedi mınıstr.
Máselen, onyń atap ótýinshe, Aqmola oblysynyń Astrahan aýdanynda osydan 3 jyl buryn apatty jaǵdaıda dep tanylǵan mektep áli jumys istep tur. 120 balaǵa arnalǵan mekteptiń ústińgi bel aǵashtary maıysyp ketken. Aǵashtan turǵyzylǵan bilim oshaǵynyń qabyrǵalary da shirı bastaǵan. Sonymen qatar Shyǵys Qazaqstan oblysynda da 2007 jyly apatty dep tanylǵan 300 jáne 240 oryndyq mektepter áli jumys istep tur.
