Respýblıkada jınaqtalǵan kommýnaldyq qaldyqtar 96 mln. tonnany qurap otyr- Qorshaǵan ortany qorǵaý mınıstri
ASTANA. Qarashanyń 16-sy. QazAqparat /Qanat Mámetqazyuly/ ‑ Elimizde jınaqtalǵan kommýnaldyq qaldyqtar 96 mln. tonnany qurap otyr. Bul týraly búgin QR Parlamenti Májilisinde ótken Úkimet saǵatynda QR Qorshaǵan ortany qorǵaý mınıstri Nurǵalı Áshimov málim etti,
dep habarlaıdy QazAqparat.
Mınıstrdiń aıtýynsha, elimizde 2009 jyldyń 9 aıynda 3,5 mıllıon tonna turmystyq qatty qaldyqtar jınaqtalǵan. Onyń 93 myń tonnasy, ıaǵnı 2 paıyzy óńdeý arqyly qaıta kádege jaratylǵan. «Resmı derekter boıynsha repýblıkadaǵy 6 myń 325 eldi mekenniń tek 1 myń 558-i nemese 25 paıyzy ǵana qaldyqtary jınaý jáne shyǵarý kásiporyndarynyń qyzmetterimen qamtylyp otyr. Qalǵan 4 myń 767 nemese 75 paıyz eldi meken tıisti qyzmet kórsetýlerden tys qalǵan. Atalǵan faktiler - apattyq qoqystardyń, eldi mekenderde, qoǵamdyq oryndarda qaldyqtardyń retsiz jáne zańsyz jınalýynyń kórinisi bolyp otyr. Sonymen birge, bul osyndaı apattyq túzilimderge qarsy kúreske jyl saıynǵy jergilikti bıýdjetten bólinetin qarjynyń mardymsyzdyǵyn kórsetedi», dedi mınıstr.
Onyń sózine qaraǵanda, Qazaqstanda turmystyq qatty qaldyqtar negizinen suryptalmastan ashyq qoqystarda jınaqtalady. Al ondaı qoqystardyń 97 paıyzy tabıǵatty qorǵaý jáne sanıtarlyq zańnama talaptaryna sáıkes kelmeıdi. «Jınaqtalǵan turmystyq qatty qaldyqtardyń jalpy kóleminiń 5 paıyzdan da tómen bóligi kádege jaratylady nemese órteledi», dedi N. Áshimov.
