Respýblıkada mektepke deıingi jastaǵy balalardyń 37 paıyzy ǵana balabaqshalarmen qamtamasyz etilgen - alqa májilisi
ASTANA. Jeltoqsannyń 4-i. QazAqparat /Gúlmıra Álıakparova/ - Respýblıkada 356 myń búldirshin balabaqshalar men shaǵyn ortalyqtarda tárbıelenýde. Bul mektepke deıingi jastaǵy balalardyń jalpy sanynyń 37 paıyzyn quraıdy. Bul týraly QR Bilim jáne ǵylym mınıstrliginiń búgin ótken alqa májilisinde belgili boldy,
dep habarlaıdy QazAqparat.
Bilim mınıstri Janseıit Túımebaevtyń aıtýynsha, búgingi kúni Qazaqstanda 356 myń bala balabaqshalar men shaǵyn ortalyqtarda tárbıelenýde. 240 myń bala óz kezekterin kútip otyrsa, 578,9 myń bala úılerinde tárbıelenýde.
«Kezekte turǵandardyń basym bóligi - Almaty (40,4 myń) men Ońtústik Qazaqstan (21,1 myń) oblystary jáne Almaty (24,4 myń) men Astana (18,9 myń) qalalarynyń úlesinde», - dep atap ótti mınıstr.
J.Túımebaev mektepke deıingi mekemelerdegi oryn tapshylyǵy problemasyn sheshý úshin birqatar sharalar qolǵa alynyp jatqanyn, solardyń nátıjesinde, 2015 jylǵa qaraı árbir turǵylyqty mekende keminde bir balabaqshadan bolatynyn, bolmasa mektepke deıingi tárbıeniń ózge túrlerin júzege asyrý úshin basqa da jaǵdaılar jasalatynyn qadap aıtty.
Sondaı-aq iri kompanııalardyń, uıymdardyń jáne kásiporyndardyń jandarynan memlekettik jáne jekemenshik balabaqshalar qurylyp, mundaı mekemelerdi salýǵa múmkindigi joq aýyldyq jerlerde januıalyq balalar baqshasyn qarqyndap damytý kózdelip otyr.
Osylaısha, 2020 jylǵa qaraı sábıler mektepke deıingi tárbıemen jáne oqytýmen tolyq qamtamasyz etiletin bolady dep kútilýde.
