Respýblıkada mektep oqýshylary tarapynan jasalatyn quqyq buzýshylyqtar men qylmystar erekshe kóńil bólýdi qajet etip otyr - dóńgelek ústel otyrysy
ASTANA. Aqpannyń 15-i. QazAqparat /Aıdar Ospanalıev/ - Búgin Astanada qalalyq bilim basqarmasy men qalalyq prokýratýra sondaı-aq «Jas Otan» uıymynyń ókilderi birlesip, №36 mektepte «Qaladaǵy jalpy bilim beretin mektepterdegi oqýshylar arasyndaǵy qylmystar men quqyq buzý áreketteriniń aldyn alý» atty taqyrypta dóńgelek ústel otyrysyn uıymdastyrdy,
dep habarlaıdy QazAqparat.
Otyrysqa qatysýshylar keltirgen málimetterge qaraǵanda, bıylǵy jyldyń qańtar aıyndaǵy jaǵdaıǵa jasalǵan taldaý jumystary jasóspirimder arasyndaǵy qylmystardyń 12,3 paıyzǵa kemip otyrǵandyǵyn kórsetken. Soǵan qaramastan respýblıkanyń keıbir aımaqtarynda qylmystar sany birshama artqan. Keı jaǵdaıda
tipti jasóspirimder tarapynan qoǵamda úlken úreı týdyrǵan aýyr qylmystarǵa barý áreketteri de tyıylmaı otyr. Osyǵan qaraı Іshki ister mınıstrliginiń ókilderi aqpannyń 15-i men 19-y aralyǵynda respýblıka aımaǵynda «Mekteptegi quqyq tártibi» atty jedel-saýyqtyrý sharasyn uıymdastyrmaq. Sharanyń maqsaty jasóspirimder arasyndaǵy jasalatyn qylmystardyń aldyn alyp, olardyń esirtki men spırtti ishimdikterdi paıdalaný jaǵdaılaryna tosqaýyl qoıyp, oqýǵa barmaı júrgen jastardy anyqtaý bolyp otyr. Sonymen qatar atalmysh shara aıasynda jasóspirimderge temeki men spırtti ishimdikter satý áreketteriniń aldyn alý maqsatynda reıdter uıymdastyrylady.
Buǵan qosa oıyn-saýyq oryndaryna da tıisti tekserýler júrgizilmek.
Májilis barysynda otyrysqa qatysýshylar ata-analarmen balalar arasyndaǵy quqyq buzýshylyqtardyń aldyn alýǵa qatysty pikir almasyp, quzyrly organdar ókilderi olarǵa aqyl-keńester berip, qundy derektermen tanystyrdy.
