Respýblıkada máslıhat depýtattyǵyna barlyǵy 1050 kandıdat usynyldy - B.Meldeshov

ASTANA. QazAqparat - Respýblıkada máslıhat depýtattyǵyna barlyǵy 1050 kandıdat usynyldy. Bul týraly búgin QR Ortalyq saılaý komıssııasynyń hatshysy Baqyt Meldeshov málim etti.

Oblystyq, Astana jáne Almaty qalalarynyń aýmaqtyq komıssııalary usynǵan málimetterge sáıkes 2016 jyldyń 1 aqpanyndaǵy saǵat 10.00-degi jaǵdaı boıynsha respýblıkada máslıhat depýtattyǵyna barlyǵy 1050 kandıdat usynyldy. Olardyń ishinde: 107-si - oblystyq, Astana jáne Almaty qalalyq máslıhattaryna, 804-i - aýdandyq máslıhattarǵa, 139-y - qalalyq máslıhattarǵa. 2 kandıdatty saıası partııalar, al 1048-i ózin-ózi usynyp otyr», - dedi ol.

Onyń atap ótýinshe, qazirgi sátte usynylǵan kandıdattardyń basym bóligi, naqty aıtqanda, 239-y Soltústik Qazaqstan, 197-si Qaraǵandy, 132-si Shyǵys Qazaqstan, 95-i Qostanaı oblystarynan tirkelgen.

«Usynylǵan kandıdattardyń beseýi Qazaqstan Respýblıkasy saıası partııalarynyń músheleri, 553-i partııada joq, taǵy 492-si óziniń partııaǵa tıesili ekenin kórsetpegen. Usynylǵan kandıdattardyń arasynda 16 ulttyń ókili bar. Er adamdar - 693, áıelder - 357. Ortasha jasy - 41 jas», - dedi B.Meldeshov.

OSK hatshysynyń málimetterine qaraǵanda, 720 kandıdattyń joǵary bilimi, 257-siniń arnaýly orta jáne 72-siniń orta bilimi bar. Kandıdattardyń 56 paıyzy memlekettik mekemelerde, uıymdarda jáne kásiporyndarda, 38 paıyzy kommertsııalyq qurylymdarda jumys jasaıdy, 6 paıyzy basqa kásippen aınalysady. Okrýgtik saılaý komıssııalary 28 kandıdatty tirkedi.

Aıta keteıik, Ortsaılaýkom bekitken kúntizbelik josparǵa sáıkes máslıhattar depýtattyǵyna kandıdattardy usyný 2016 jylǵy 19 aqpanǵa, al tirkeý 23 aqpanǵa deıin júrgiziledi.