Respýblıkada kúıdirgi aýrýyna qatysty jaǵdaı ýshyǵyp tur - Bas prokýratýranyń resmı ókili
ASTANA. Qazannyń 29-y. QazAqparat /Aıdar Ospanalıev/ - Prokýratýra ókilderiniń elimizdiń birqatar aımaqtarynda paıda bolǵan kongo-qyrym bezgegi jáne kúıdirgi sııaqty aýrýlarmen kúres sharalarynyń zańdylyǵyn tekserý barysynda 400-den astam zań buzý áreketteri anyqtalyp, 143 usynys engizilgen.
Sondaı-aq tekserý qorytyndylary boıynsha 176 ákimshilik quqyq buzýshylyq jáne 2 qylmystyq is qozǵalǵan. Al 8 is quqyq qorǵaý organdaryna arnaıy protsessýaldyq sharalar qoldaný úshin jiberilgen. Bul málimettermen búgin jýrnalısterdi Bas prokýratýranyń resmı ókili Nurdáýlet Súıindikov tanystyrdy, dep habarlaıdy QazAqparat.
Onyń aıtýynsha, Bas prokýratýra tekserý barysynda anyqtalǵan kemshilikterdi joıý jóninde Úkimetke arnaıy usynys daıyndaýda. «Respýblıkada qazir, ásirese, kúıdirgi aýrýyna qatysty jaǵdaıdyń ýshyǵyp turǵandyǵyn atap ótý kerek. Olardyń taraýyna kóbine mal baýyzdaý men maldy kómý sııaqty oryndardyń sanıtarlyq talapqa saı emestigi sebep bolýda», dedi resmı ókil.
Onyń sózine qaraǵanda, respýblıkanyń keıbir aımaqtarynda atalmysh indetpen naýqastanǵandarǵa talapqa saı medıtsınalyq qyzmet kórsetilmeý áreketteri anyqtalǵan. Nátıjesinde azamattardyń keıbiriniń aýrýy asqynyp, qaıtys bolý jaǵdaılary da oryn alǵan.
