Respýblıkada qurǵaqshylyq saldarynan 353 myń gektar dándi daqyldar egistigi esepten shyǵarylady - AShM
ASTANA. 24 shilde. QazAqparat - Respýblıkada 353 myń gektar dándi daqyldar egistigi esepten shyǵarýǵa jatady.
Bul týraly búgin Úkimettiń selektorlyq otyrysynda Aýyl sharýashylyǵy mınıstri Asyljan Mamytbekov málimdedi.
«Qazgıdromet» RMK derek kózderi boıynsha Qazaqstannyń keıbir aımaqtarynda qurǵaqshylyq jaǵdaıy qalyptasýda. Bul aýyl shaýarshylyǵynyń damýyna keri áser etýde. Qurǵaqshylyq Qostanaı oblysynyń ońtústik bóliginde - Amangeldi, Jangeldi, Qamysty, Naýryzym, Áýlıekól, Jitiqara, Taran, Qostanaı aýdandarynda, Aqmola oblysynyń Jarqaıyń, Esil aýdandarynda jáne Jaqsy men Atbasar aýdandarynyń ońtústik bólikterinde, Qaraǵandy oblysynyń ońtústik bólikterinde - Ulytaý, Jańarqa, Shetpe, Aqtoǵaı aýdandarynda, Aqtóbe oblysynyń ońtústik jáne shyǵys bólikterinde - Áıteke bı, Hromtaý, Alǵa, Yrǵyz, Shalqar, Temir, Baıǵanın aýdandarynda keńinen taraǵan», -dedi mınıstr.
Onyń atap ótýinshe, respýblıka boıynsha dándi-daqyldardyń 33 paıyzy jaqsy, 55 paıyzy ortasha, 12 paıyzy nashar. Ásirese, Qostanaı oblysy qurǵaqshylyqtan qatty zardap shegýde. Bul óńirde dándi daqyldar egistiginiń 18 paıyzy ǵana táýir. Oblystardyń aldyn ala bergen derekteri boıynsha 353 myń gektar dándi daqyldar egistigi esepten shyǵarýǵa jatady. Onyń 203,1 myń gektary Aqtóbe oblysyna, 32,8 myń gektary Almaty oblysyna, 38,2 myń gektary Jambyl oblysyna, 15,1 myń gektary Batys Qazaqstan oblysyna, 57,6 myń gektary Qaraǵandy oblysyna, 6,5 myń gektary Ońtústik Qazaqstan oblysyna tıesili. «Oblystardyń boljamdy balansy boıynsha jańa eginnen 12,8 mln. tonn astyq jınalady», -dedi A. Mamytbekov.
