Respýblıkada qaýipsizdik qaǵıdalaryn saqtamaýdan bes myńnan astam órt oryn alǵan
ASTANA. QazAqparat - Elimizde qaýipsizdik qaǵıdalaryn saqtamaýdyń saldarynan 2015-2016 jyldary 5 myńnan astam órt oryn alypty. Órt ásirese jylý berý maýsymy kezinde órshigen.
Bul týraly búgin Ortalyq kommýnıkatsııalar qyzmetinde ótken brıfıngte QR Іshki ister mınıstrligi Tótenshe jaǵdaılar komıteti tóraǵasynyń birinshi orynbasary Sábıt Bıtaev málimdedi.
«Ókinishke qaraı, ótkizilip jatqan úgitteý-profılaktıkalyq jumystaryna qaramastan 2015-2016 jyldary jylý berý maýsymy kezinde respýblıkada 7 616 órt tirkeldi. Sonyń ishinde 73 % (5 581 órt) turǵyn sektorda órt qaýipsizdigin saqtamaý saldarynan oryn alǵan. Nátıjesinde, 1,29 mıllıard teńge kóleminde materıaldyq zalal kelgen. 370 adam ártúrli dárejede jaraqat alyp, 232 adam kóz jumǵan» - dedi Sábıt Bıtaev.
Órttiń shyǵýyna halyqtyń otty abaısyz paıdalanýy ( 2 273), peshterdi ornatý jáne paıdalaný kezinde órt qaýipsizdik qaǵıdalaryn buzý (1147), elektr jabdyqtardy montajdaý jáne tehnıkalyq paıdalaný qaǵıdalaryn buzýy (746) sebep bolǵan.
S.Bıtaev vedomstvo júrgizip jatqan órt profılaktıka sharalary týraly da aıtyp ótti. «Nusqaýlyqtar júrgizý kezinde evakýatsııalaý joldarynyń, kóppáterli turǵyn úılerdegi kópshilik paıdalanatyn oryndardyń jaı-kúıine erekshe kóńil bólinedi. Bóten adamdardyń shatyrdyń asty men jertólege ruqsatsyz kirýine jol bermeý, otyndy saqtaý rejimi, qazandyqtar men basqa da jylý beretin qurylǵylardy paıdalaný qaǵıdalary túsindiriledi.
Sondaı-aq oqý oryndarynda oqytýshylardyń qatysýymen mektep oqýshylaryna dárister berilip, beınerolıkter kórsetildi. Alda qazan aıynda tótenshe jaǵdaılardyń aldyn alý jáne olardy joıý jónindegi vedomstvoaralyq memlekettik komıssııa ótkizgeli otyrmyz. Bul júmys jergilikti jerlerde, oblys, qala, aýdan ákimderi basqaratyn tótenshe jaǵdaılar jónindegi komıssııalar deńgeıinde uıymdastyrylady», dedi S.Bıtaev.
Brıfıng sońynda órt qaýipsizdigi senbiligi ótkizilip, 80 myńǵa jýyq aqparattyq broshıýra, nusqaýlyq, jadynama taratylyp, 50 myńnan astam turǵyn úıdiń qamtylǵany belgili boldy. Sondaı-aq vedomstvo basshysynyń orynbasary S.Bıtaev elimizde volonterler qaýymdastyqtaryna ótinish jasap, halyq arasynda birlesip úgit-nasıhat júrgizýge shaqyrdy.
Jansaıa Sydyqbaı
