Respýblıkada qan quıý ortalyqtarynyń Biryńǵaı aqparattyq keńistigin quratyn kez jetti

Bul týraly búgin Astanada ótip jatqan «Transfýzııalyq terapııa qaýipsizdigin qamtamasyz etýdiń qazirgi zamanǵy tehnologııalary» atty respýblıkalyq ǵylymı-tájirıbelik konferentsııa barysynda Transfýzıologııa ǵylymı-óndiristik ortalyǵynyń dırektory Jandos Búrkitbaev málim etti.

Onyń sózinshe, Biryńǵaı aqparattyq keńistik qan quıý salasyndaǵy qyzmetterdi rettep, olardy bir standartqa keltirýge múmkindik beredi. Osy ýaqytta biryńǵaı aqparattyq keńistik qurý máselesimen eldegi árbir ortalyq múmkindikterine qaraı ózderi aınalysýda.

«Transfýzıologııa ǵylymı-óndiris ortalyǵy 2010 jyly jańa avtomattandyrylǵan júıeni iske qosty. Ol qan quıý qyzmetindegi barlyq talaptarǵa jaýap beredi. Osy ýaqytta bul baǵdarlama Qazaqstandaǵy 8 qan quıý uıymyna engizildi. Endi biz osy atlaǵan barlyq baǵdarlamalardy biriktirý qajet degen baılamǵa kelip otyrmyz. Bul shara elde biryńǵaı donorlyq ortalyq quryp, on-laın rejıminde aqparattarmen almasýǵa múmkindik beredi. Sondaı-aq bul qyzmet densaýlyǵynda donorlyqqa zııanyn tıgizýi múmkin dertter bar azamattar jóninde málimet bere alatyn ózge de organdarmen baılanysýǵa jaǵdaı týdyrady»,-dedi J.Búrkitbaev.