Respýblıkada áıel qyzmetkerlerdiń quqyqtary men genderlik tepe-teńdik saıasatynyń damýyna beı-jaı qaramaıtyn basshylardyń arasynda baıqaý ótedi
ASTANA. 9 qarasha. QazAqparat /Gúlmıra Álıakparova/ - Ujymdaǵy áıel qyzmetkerlerdiń quqyqtarynyń qamtamasyz etilýi men genderlik tepe-teńdik saıasatynyń damýyna jete mán beretin basshylar baıqaý barysynda anyqtalyp, marapattalatyn bolady.
Erteń, 10 qarasha kúni bastalatyn respýblıkalyq baıqaý «Genderlik saıasatqa beı-jaı qaramaıtyn basshy» taqyrybymen ótpek. Ony QR Prezıdenti janyndaǵy Áıelder isteri jáne otbasylyq-demografııalyq saıasat jónindegi Ulttyq komıssııa men «Qazaqstannyń Іsker áıelder Qaýymdastyǵy» Respýblıkalyq qoǵamdyq birlestigi uıymdastyryp otyr.
Respýblıkalyq baıqaýdyń maqsaty - «2006-2016 jyldarǵa deıingi Qazaqstan Respýblıkasyndaǵy genderlik tepe-teńdik strategııasyn» nasıhattaý, memlekettik jáne memlekettik emes sektordaǵy mekemeler men kásiporyndardyń birinshi basshylaryn ujymdaǵy áıelder qaýymyna, olardyń jumys jaǵdaıyna nazar aýdartý.
Baıqaý barysynda birinshi basshylardyń arasynda saýalnama júrgiziledi. Olar: «Qol astyńyzda jumys isteıtin qyzmetkerdiń naqty sanyn bilesiz be?», «Olardyń arasyndaǵy áıelder sanyn bilesiz be?», «Júkti áıelder úshin jasalyp otyrǵan jaǵdaılar», «Memlekettik qazynadan qandaı da bir áleýmettik tólemaqylardy alatyn áıelderdiń sanyn bilesiz be?», «Basshylyq qyzmetterde qansha áıel otyr?» degen sııaqty suraqtarǵa jaýap berýi tıis bolady.
Komıssııa saýalnamalardy saraptap, 10 atalym boıynsha jeńimpazdardy anyqtaıtyn bolady. Olar genderlik tepe-teńdik saıasatyna beı-jaı qaramaıtyn QR Parlamentiniń depýtaty, oblys ákimi, úkimettik emes uıym, BAQ, joǵary oqý orny, banktik jáne qarjylyq uıym, ónerkásiptik kásiporyn, ulttyq kompanııa men shaǵyn jáne orta bıznes salasyndaǵy basshy atalymdary boıynsha tańdap alynady.
