Respýblıkada 6 jasqa deıingi balalardy polıomıelıtke qarsy ımmýndaý is-sharasy bastalady - Densaýlyq saqtaý mınıstrligi
ASTANA. Tamyzdyń 25-i. QazAqparat /Jasulan Amanbaıuly/ - QR Densaýlyq saqtaý mınıstrligi 6 jasqa deıingi balalardy polıomıelıtke qarsy ımmýndaý is-sharasyn bastaıdy.
Bul týraly búgin Astanadaǵy semınar barysynda vedomstvonyń Memlekettik sanıtarlyq-epıdemıologııalyq qadaǵalaý komıteti tóraǵasynyń orynbasary Aıjan Esmaǵambetova málim etti, dep habarlaıdy QazAqparat.
Mınıstrlik, BUU-nyń Balalar qorymen birlesip egý naýqanyn qyrkúıektiń 6-sy men 10-y aralyǵynda ótkizýdi josparlap otyr. Bul kúnder Qazaqstanda resmı túrde «Polıomıelıtke qarsy ımmýnızatsııalaýdyń ulttyq kúnderi» dep belgilengen.
A. Esmaǵambetovanyń aıtýynsha, osy aralyqta el kóleminde egý jumystarymen 6 jasqa deıińgi 1 mln. 800 myń balany qamtý josparlanýda.
«Búginderi mınıstrlik, BUU-nyń Balalar qorynyń qoldaýymen 2 mln. ólshem vaktsına qoryn satyp aldy. 6 jasqa deıińgi balalardy polıomıelıtke qarsy qosymsha egýdi ótkizýdiń qajettiligi Tájikstanda polıomıelıttiń kenetten órshýi jáne onyń Reseı, Ózbekstan, Mońǵolııa elderine taralýynan týyndap otyr», deıdi ol.
Qazaqstanda polıomıelıt aýrýy sońǵy ret 1995 jyly tirkelgen. Qazirgi ýaqytta osy dert boıynsha epıdemıologııalyq jaǵdaı turaqty. Balalardyń egýmen qamtylýy 2009 jyly 98 paıyzdan astam quraǵan. 2002 jyly Dúnıejúzilik densaýlyq saqtaý uıymy bizdiń eldi polıomıelıtten bos el dep jarııalady.
Polıomıelıt vırýsy - negizinen 6 jasqa deıińgi balalardy sharpıdy. Ol aýyz qýysy arqyly enip, balanyń bulshyqetterin, júıke talshyqtaryn zaqymdaıdy. Kóbine kóp dert balalardy sal aýrýyna dýshar etedi. Al 20 paıyz oqıǵa ólimmen aıaqtalady.
