Respýblıka joldary arqyly jolaýshylar men júk tasymalyna baqylaýdy ІІM júrgizetin boldy
ASTANA. 27 maýsym. QazAqparat - «Qazaqstan Respýblıkasynyń keıbir zańnamalyq aktilerine memlekettik organdardyń ózara basqarý ókilettiligin bólý máseleleri jóninde tolyqtyrýlar men ózgertýler engizý týraly» zańnamaǵa engizilgen normaǵa sáıkes,
QR Kólik jáne kommýnıkatsııa mınıstrliginiń Kóliktik baqylaý komıtetiniń birqatar baqylaý fýnktsııalary QR Іshki ister mınıstrliginiń Jol polıtsııasy komıtetiniń quzyryna berildi.
Zańǵa engizilgen atalǵan norma eki memlekettik organ qyzmetterin ózara ajyratyp, olardyń respýblıka joldarynda júrgizetin baqylaý fýnktsııalarynyń qaıtalanýyna baılanysty kórinis bergen sybaılas jemqorlyqty joıýǵa múmkindik beredi, dep habarlady QR Kólik jáne kommýnıkatsııa mınıstrliginiń baspasóz qyzmetinen.
Endigi jerde QR Іshki ister mınıstrliginiń Jol polıtsııasy komıteti avtokólik quraldary júrgizýshileriniń eńbek jáne demalys tártibiniń saqtalýyn, avtokólikterde tahograf quraldarynyń bolýyn jáne onyń jumys istep turýyn, sondaı-aq, kólikke ornatylǵan otyn quıatyn ydystyń shyǵarýshy zaýyttyń talaptaryna saı bolýyn tekseretin bolady.
Budan basqa, QR ІІM qyzmetkerleri tasymaldaýshylardyń Jolaýshylar men júkterdi tasymaldaý týraly erejesi men Lıtsenzııalaý jónindegi QR zańnamasynyń saqtalýyn qadaǵalaıdy.
Sondaı-aq, tasymaldaýshylarda halyqaralyq jáne oblysaralyq baǵyttaǵy jolaýshylar tasymalymen turaqty túrde aınalysýǵa beriletin ruqsatnamanyń bolýyn tekserý, jolaýshylar tasymaldarynyń kórsetilgen baǵytty, júrý kestesin saqtaýyn baqylaý, jolaýshylar men júkterdi halyqaralyq baǵytta turaqsyz túrde tasymaldaý barysynda kóliktegi jolaýshylar tiziminiń bar bolýyn tekseredi.
Al, Kóliktik baqylaý organdary óz kezeginde kólikke tıelgen júkterdiń salmaqtyq jáne gabarıttik parametrleriniń saqtalýyn, sondaı-aq shet eldik tasymaldaýshylardyń Qazaqstan Respýblıkasynyń aýmaǵy arqyly júrýine berilgen ruqsatnamanyń bolýyn tekseredi.
Osy oraıda aýyr júk kólikteriniń salmaq pen gabarıttik parametrlerin qozǵalys barysynda ólsheýge múmkindik beretin arnaıy avtomattandyrylǵan júıe engizilýde. Bul júıe júkti ruqsat etilgen salmaq mólsherinen artyq tıegen júk kólikterin ǵana toqtatýǵa jáne jol boıynda júk kólikterin sebepsiz tekserýdi boldyrmaýǵa múmkindik beredi. Osy maqsatta Kedendik odaqqa múshe elderdiń quzyrly organdarymen ózara aqparat almasýy uıymdastyrylǵan.
Osylaısha, Kóliktik baqylaý jáne Jol polıtsııasy organdarynyń ókilettiligin ózara ajyratý júrgiziletin baqylaýdyń tıimdiligi men qaýipsizdik deńgeıin arttyrýǵa, respýblıkamyzdaǵy avtomobıl joldary jelilerin ýaqytynan buryn buzylýdan saqtaýǵa múmkindik beredi.
QR KKM Kóliktik baqylaý komıtetiniń birqatar baqylaý fýnktsııalaryn QR ІІM Jol polıtsııasy komıtetine berýdi kózdeıtin «Qazaqstan Respýblıkasynyń keıbir zańnamalyq aktilerine memlekettik organdardyń ózara basqarý ókilettiligin bólý máseleleri jóninde tolyqtyrýlar men ózgertýler engizý týraly» zań 2013 jylǵy 24 maýsymda óz kúshine endi.
