Respýblıka joldaryndaǵy jol apattarynan bolatyn ólim-jitim 26,8 paıyzǵa tómendedi

QazAvto Jol jol qaýipsizdigin basqarýdyń jańa kezeńine ótti

2026 jyldyń alǵashqy bes aıynyń qorytyndysy boıynsha jol-kólik oqıǵalarynan qaza tapqandar sany 26,8%-ǵa tómendep, 336 adamnan 246 adamǵa deıin azaıdy. Bul ótken jyldyń sáıkes kezeńimen salystyrǵanda 90 adamnyń ómirin saqtap qalýǵa múmkindik berdi.

Ólim-jitim kórsetkishimen qatar ózge de negizgi ındıkatorlarda oń ózgerister baıqalady. Jol-kólik oqıǵalarynyń sany 1 214-ten 1 151 jaǵdaıǵa deıin nemese 5,2%-ǵa azaıdy. Al jaraqat alǵandar sany 2 376 adamnan 2 181 adamǵa deıin tómendep, 8,2% qysqardy.

Bul kórsetkishter respýblıkalyq joldardaǵy qaýipsizdik júıesiniń jańa kezeńge ótkenin ańǵartady. Eger buryn negizgi sharalar apat oryn alǵannan keıin qabyldansa, búginde basymdyq táýekelderdi aldyn ala basqarýǵa, tsıfrlyq baqylaýǵa, ınjenerlik qaýipsizdik sheshimderine, qozǵalys jyldamdyǵyn retteýge jáne joldardyń jaı-kúıine jeke jaýapkershilikti arttyrýǵa berilip otyr.

Eń mańyzdy nátıje – aýyr zardaptardyń azaıýy

Jol-kólik oqıǵalarynyń sanyna qozǵalys qarqyndy, aýa raıy jaǵdaıy, júrgizýshilerdiń tártibi, kólik quraldarynyń tehnıkalyq jaı-kúıi jáne adam faktory sııaqty kóptegen sebep áser etedi. Sondyqtan apattardyń jalpy sany ǵana emes, olardyń saldary da erekshe mańyzǵa ıe.

Osy turǵydan alǵanda eń mańyzdy nátıje – qaza tapqandar sanynyń úshten birge jýyq tómendeýi. Bul qabyldanyp jatqan sharalardyń eń aldymen aýyr jáne adam ólimine ákeletin jol apattarynyń aldyn alýǵa baǵyttalǵanyn kórsetedi.

Nátıjesinde respýblıkalyq joldar júrgizýshiler úshin boljamdy ári qaýipsiz bola tústi, qaýipti ýchaskeler aıqynyraq belgilenip, qolaısyz aýa raıynyń táýekelderi tıimdi basqarylyp, jol qyzmetteriniń áreket etý jyldamdyǵy artty.

Qaýipsizdik júıesi jańa tásilmen damyp keledi

Qol jetkizilgen nátıjelerdiń negizgi sebebi – jol qaýipsizdigine degen kózqarastyń túbegeıli ózgerýi.

«QazAvtoJol» ulttyq kompanııasy normatıvtik retteý, tsıfrlandyrý, tehnıkalyq quraldardy jańǵyrtý, qysqy kútip-ustaý, jol aqaýlarynyń aldyn alý, jol jumysshylaryn qorǵaý jáne tótenshe jaǵdaılarǵa jedel áreket etý baǵyttarynda keshendi jumystar júrgizip jatyr.

2025 jyly joldardy kútip-ustaý, jabyndardy profılaktıkalyq óńdeý, tehnıkany paıdalaný, jol jumystaryn uıymdastyrý qaýipsizdigi, apatty ýchaskelerdi taldaý jáne tapsyrmalardyń oryndalýyn baqylaý máselelerin qamtıtyn 15-ten astam ishki normatıvtik qujat qabyldandy.

Sonymen qatar jol-kólik oqıǵalary jıi tirkeletin oryndar men táýekeli joǵary ýchaskeler turaqty túrde taldanyp keledi. 2025 jyldyń qarasha aıynan bastap oblystyq fılıaldar bólinisinde apat statıstıkasy apta saıyn qaralyp, naqty tapsyrmalar beriledi jáne olardyń oryndalýy baqylaýǵa alynady.

Bul jol qaýipsizdiginiń tek tehnıkalyq másele emes, tolyqqandy basqarý júıesine aınalǵanyn kórsetedi.

Tsıfrlyq tehnologııalardyń tıimdiligi dáleldendi

Jol qaýipsizdigin arttyrýdaǵy eń tıimdi sheshimderdiń biri – aýyspaly aqparat belgilerin engizý boldy.

Mundaı júıeler Astana – Şýchınsk jáne Astana – Qaraǵandy avtojoldarynda ornatylǵan. Qys mezgilinde bul baǵyttar boran, kóktaıǵaq jáne kórinýdiń nasharlaýy saldarynan eń kúrdeli ýchaskelerdiń biri sanalady.

Aýyspaly aqparat belgileri naqty jol jáne aýa raıy jaǵdaıyna sáıkes jyldamdyq rejımin jedel ózgertýge múmkindik beredi. Sonyń nátıjesinde júrgizýshi jalpy eskertý emes, naqty jaǵdaıǵa beıimdelgen shekteýdi kóredi.

Nátıjesinde 2025–2026 jylǵy qys mezgilinde atalǵan ýchaskelerdegi jol-kólik oqıǵalarynyń sany 53%-ǵa tómendep, 57 jaǵdaıdan 27 jaǵdaıǵa deıin azaıdy. Qaza tapqandar sany 9 adamnan nólge deıin tómendedi. Al jaraqat alǵandar sany 102 adamnan 46 adamǵa deıin qysqaryp, 55%-ǵa azaıdy.

Astana – Şýchınsk baǵytynda apattylyq deńgeıi 57%-ǵa, al Astana – Qaraǵandy baǵytynda 53%-ǵa tómendedi. Eki baǵytta da taldaý kezeńinde adam ólimi tirkelgen joq.

Túngi qaýipsizdikke erekshe nazar aýdarylyp otyr.

Osyǵan deıin Úlken Almaty aınalma jolyn dıagnostıkalaý jumystary bastalǵany týraly jazdyq.