Respýblıka JІÓ-sindegi kólik salasynyń úlesi shamamen 7-8 paıyzdy quraıdy

ASTANA. QazAqparat - Respýblıka JІÓ-sindegi kólik salasynyń úlesi shamamen 7-8 paıyzdy quraıdy. Bul týraly búgin «Qazaqstan Respýblıkasynyń kólik áleýetin júzege asyrý negizderi» atty halyqaralyq ǵylymı-tájirıbelik konferentsııa barysynda QR Investıtsııalar jáne damý mınıstrligi Kólik komıtetiniń tóraǵasy Áset Asaýbaev aıtty.

«Ózderińiz de biletindeı, kólik salasy bizdiń elimizdiń ekonomıkasyn damytýda mańyzdy orynǵa ıe. Sońǵy jyldary respýblıka JІÓ-sindegi kólik salasynyń úlesi shamamen 7-8 paıyzdy qurady. «Nurly jol» memlekettik baǵdarlamasy aıasynda ınfraqurylymdyq jobalardy keń aýqymda júzege asyrý júrgizilýde. Olardyń daǵdarysqa qarsy sıpaty bar, jańa jumys oryndaryn qurýǵa septigin tıgizedi jáne ekonomıkaǵa mýltıplıkatıvtik áser berdi»,- dedi ol.

Komıtet basshysynyń atap ótýinshe, qazirdiń ózinde avtomobıl joldary jobalarynda shamamen 100 myń adam jumyspen qamtylǵan. Munan ary bul salada jumyspen qamtylǵandar sany 200 myń adamǵa jetkiziledi.

«Nurly jol» baǵdarlamasy aıasynda avtomobıl salasynda 2020 jylǵa deıin 11 jobany júzege asyrý kózdelgen. Aǵymdaǵy jyly respýblıkalyq mańyzdaǵy avtomobıl joldaryn damytýǵa 300 mlrd. teńgeden astam, onyń ishinde respýblıkalyq bıýdjetten 178 mlrd. teńge qarjy bólindi. Atalǵan qarjy esebinen 8 joba júzege asyrylýda. Olardyń qatarynda «Batys Eýropa - Batys Qytaı», «Ortalyq - Ońtústik», «Ortalyq - Batys», «Almaty - Óskemen», «Astana - Petorpavl-Almaty» syndy jobalar bar», - dedi Á.Asaýbaev.