Respýblıka saraıynyń qaıta jaraqtandyrý jumystary aıaqtalyp qaldy
ALMATY. 22 qarasha. QazAqparat /Názıra Eleýhan/ - Respýblıka saraıyn qaıta jaraqtandyrý jumystary aıaqtalyp qaldy. Bul týraly qala ákimi Ahmetjan Esimovtiń Respýblıka saraıyna jasaǵan kezekti jumys sapary barysynda aıtyldy. Qala basshysy, nysannyń qurylys jumystary barysymen tanysyp, qala turǵyndary men úlken megapolıs qonaqtarynyń qaýipsizdigin saqtaý eń ózekti másele ekendigin erekshe atap aıtty.
Qazirgi kezde Respýblıka saraıynda árleý jumystary aıaqtalýda. Qondyrǵylar montajdalyp, barlyq deńgeıdegi qaýipsizdik júıeleri ornatylýda, sonyń ishinde «antıterror» júıesi de qoıylýda. Búgingi kúnge deıin qalpyna keltirý jumystary túgel oryndalǵan, energojınaqtaý tehnologııalary ornatylyp, eskirgen konstrýktsııalar men qondyrǵylar jańartyldy, tipti, mádenıet oshaǵynyń syrtqy kelbeti de tolyqtaı ózgertilgen. Seısmıkalyq tózimdilik sharalary da júzege asyrylǵan. "Barlyq jumystar bekitilgen kestege saı júrýde",-deıdi mamandar.
Esterińizge sala keteıik, 40 jyl ishinde esh jóndeý kórmegen Respýblıka saraıy 2010 jyly kúrdeli jóndeýge qoıylǵan bolatyn.
Fasadty jańǵyrtý barysynda eleýli ózgerister boldy, eski qabattar jańa ári ádemi árleý materıaldarymen almastyryldy, munyń barlyǵy qazirgi zaman arhıtektýrasy talaptaryna saı jasalýda. Terezeler, vıtrajdar, esikter zamanaýı materıaldarmen tolyq jańartyldy. Saraıdyń syrtqy qanattary, baspaldaqtary, bloktaryna da jóndeý jumystary júrgizildi. Árleý jumystaryna sapaly, ekologııalyq qaýipsiz qurylys materıaldary qoldanylǵan. Qabyrǵalar men bólikter KazNIISS RMK-nyń nusqaýy boıynsha, qataıtyldy.
Órt qaýipsizdigi sharalary da myqtap qolǵa alynǵan, jańa tehnıkalyq talaptarǵa saı júrgizilgen. Sahnaǵa órtke qarsy shymyldyq ilinetin bolady.
Jańalanǵan sahnada úsh kóterme mehanızmi bar orkestr otyratyn oıyq jasaldy, onda sondaı-aq, mýzykalyq jabdyqtar saqtalatyn oryn da bar. Bul Respýblıka saraıynyń úlken jańashyldyǵy bolyp otyr.
Ǵımaratta múmkindikteri shamaly jandardyń qozǵalysy da eskerilgen. Jańa sanıtarlyq talaptarǵa saı azyq- túlik bloktary, býfetter jasalýda. Ákimshilik jáne qosymsha bólmeler de túgel ózgertildi. Qyzmet kórsetý sapasyn jaqsartý maqsatynda jańadan qosymsha bólmeler - 50 oryndy konferents zal, ásemdik salony, aýdıokıosk; gúl dúkeni, dybys jazatyn stýdııalar ashylatyn bolady.
Jańǵyrtý jumystary barysynda ǵımarat aldy men parkıng abattandyrylady.
