Respýblıka óńirlerinde 2 myń shaqyrymnan astam elektr jelisi jańǵyrtylady
ASTANA. 13 shilde. QazAqparat - Elimizdiń óńirlerinde ıesiz turǵan 2 myń shaqyrymnan astam elektr symdary jáne 1 myńdaı transformatorlyq kishi stansalar men taratý pýnktteri jańǵyrtylady,
dep habarlady pm.kz saıty.
Indýstrııa jáne jańa tehnologııalar mınıstrligi Memlekettik energetıkalyq qadaǵalaý jáne baqylaý komıtetiniń aqparaty boıynsha, elektr taratýshy uıymdar qazirgi tańda barlyq sanattaǵy kerneýdegi shamamen 430 myń shaqyrymdaı elektr jelisine qyzmet kórsetedi, sondyqtan da ıesiz turǵan jeliler respýblıka kólemindegi barlyq jelilerdiń 1 paıyzy jýyǵyn quraıdy. Ondaı nysandar Almaty, Qyzylorda, Ońtústik Qazaqstan jáne Jambyl oblysynda kóp anyqtalyp otyr.
Komıtettiń tóraǵasy Arman Turlybektiń aıtýynsha, osy ıesiz jeliler elektr qýaty sapasynyń tómendeýine jáne tehnıkalyq shyǵyndarǵa sebep.
"Mundaı jeliler alys aýdandarda ornalasqan jáne shaǵyn eldi mekenderdi elektr qýatymen qamtamasyz etip otyr. Eshkimniń qaramaǵynda bolmaǵandyqtan jáne olarǵa qarastyrylǵan qyzmetterdiń aqysy elektr qýatynyń tarıfine engizilmegendik, elektr qýatyn taratýshy kompanııalar bul jelilerdi jóndeý jáne tehnıkalyq kútý máselelerin ózderi sheshýge májbúr»,- dep atap kórsetti A.Turlybek.
Osyǵan oraı, jelilerdiń tehnıkalyq jaǵdaıyna baǵa berý jáne jóndeý jumystaryn qarjylandyrýdy qamtamasyz etý úshin oblys ákimdikteri ıesiz elektr jelilerine túgendeý jumystaryn júrgizýde.
Komıtettiń elektr jelilerin qadaǵalaý jáne baqylaý basqarmasynyń bastyǵy Erbolat Amanǵalıev pm.kz saıtyna bergen suhbatynda elektr jelilerin jekeshelendirý jáne jóndeý jumystaryn júrgizýdiń barysy týraly áńgimelep berdi.
«Anyqtalǵan ıesiz jeliler týraly málimetterdi ákimdikter óńirlerdegi Jyljymaıtyn múlik ortalyqtaryna joldaıdy, al ortalyqtar óz kezeginde olardy ıesiz nysandar retinde tirkeıdi. Eger bir jyldyń ishinde ol jelilerdiń ıesi tabylmasa, ákimdikter olardy jekeshelendiredi. Nysandar kommýnaldyq menshikke qabyldanǵannan keıin ǵana barlyq is-sharalar normatıvtik-quqyqtyq aktilerge sáıkes júrgiziledi, atap aıtqanda tehnıkalyq kýálandyrý, odan keıin jańǵyrtý, jóndeý jumystary júrgiziledi»,- deıdi basqarma bastyǵy.
«Aıta ketý kerek, ıesiz jáne ábden tozyǵy jetken jelilerdi anyqtaý jumystary elektr jáne jylý jelilerin aldaǵy kúzgi-qysqy maýsymǵa ázirleý turǵysynda asa ózekti bolyp tabylady. Qazir ákimdikter ıesiz jáne tozǵan jelilerdi túgendeý jumystaryna monıtorıng júrgizilýde, atqarylǵan jumystardyń qorytyndysy 1 qyrkúıekke qaraı qolymyzǵa tıedi»,- dedi E.Amanǵalıev.
Al Qazaqstannyń Elektroenergetıkalyq qaýymdastyǵynyń tóraǵasy Sháımerden Orazalınov: «Bul jumystar óńirderle sapaly atqarylýy tıis. Bizde ol úshin qajetti zańǵa baǵynatyn aktiler men zańnamalyq baza bar. Meniń oıymsha, óńirlerde ıesiz turǵan jylý, sý jáne elektr jelileriniń problemasyn 3 jylda tolyq sheshýge bolady»,- dedi pm.kz saıtyna bergen suhbatynda.
Jyldyń basynan beri Qazaqstannyń barlyq óńirinde ıesiz elektr jelileri men nysandardy anyqtaý jumysy júrgizildi. Sonyń barysynda ıesiz 2 myńdaı elektr jelisi men 1 myńǵa jýyq qosalqy stansalar anyqtaldy. Qazirgi ýaqytta atalǵan energonysandar men jelilerdi qalpyna keltirý jumystary júrgizilýde.
