Qazaqstanda otandyq kınolar aptalyǵy ótedi
Respýblıka kúnine oraı otandyq kıno aptalyǵy ótedi, dep habarlaıdy Kazinform.
Respýblıka kúnine oraı otandyq telearnalardyń efırinde Olımpıada chempıony Serik Sápıevtiń ómiri týraly Aqan Sataevtyń «Bokser» sport dramasy, qazirgi qazaq aýylynyń beınesin kórsetetin Serik Aprymovtyń «Aýyl» avtorlyq kınosy, injil sıýjeti men áıgili almatylyq aporttar toǵysqan Asqar Uzabaevtyń «Adam jáne alma» melodramasy, Serikbol Ótepbergenovtyń «Patrıottar ýaqyty» atty aýqymdy ekshn-fılmi, qazaq dalasynyń áıgili áıelderi týraly «Eýrazııa patshaıymdary» derekti fılmi men AQSh-taǵy festıvaldarda júlde alǵan «Kóshe aqyny» qysqametrajdy fılminiń tusaýkeseri ótedi.
Jalpy 23-29 qazan aralyǵynda otandyq telearnalar sońǵy birneshe jylda memlekettiń qoldaýymen túsirilgen 15 tolyqmetrajdy, derekti jáne qysqametrajdy fılmdi kórsetedi.
Qazaqstandyq kıno aptalyǵynyń ótkizý bastamasyn Qazaqstan, «Habar», «Jetinshi arna» jáne «31» medıa holdıngi qoldap otyr.
«Otandyq kınoóndiristi damytý jáne ulttyq fılmderdi tanymal etý baǵytyndaǵy jumystar belsendi júrip jatyr. Fılmderimizdiń qalyń kórermenge qoljetimdi bolýy – biz úshin mańyzdy. Ásirese, Respýblıka kúni merekesinde búkil otbasymen jınalyp, teledıdardan otandyq kınony tamashalaǵanǵa ne jetsin», - dedi UKQMO basqarma tóraǵasy Qurmanbek Jumaǵalı.
Aıta ketsek, kınoortalyq búgin memlekettiń qoldaýymen túsirilgen fılmderdi nasıhattaý týraly «31 arnamen» memorandýmǵa qol qoıdy.
Buǵan deıin yntymaqtastyq týraly kelissóz Qazaqstan RTRK, «Habar» agenttigi jáne «Jetinshi arna» telearnalarymen jasalǵan bolatyn.
«Basty otbasylyq telearna retinde biz Kınoortalyqpen seriktestikti arttyrýǵa jáne aqparattyq qoldaý kórsetýge qýanyshtymyz. Qazirdiń ózinde biz kóreremenderimizge jańadan shyqqan fılmderdi kórsetýdi ádetke aınaldyrdyq jáne bolashaqta Ulttyq kınony qoldaý memlekettik ortalyǵy túsirgen týyndylarmen qorjynymyzdy baıytatyn bolamyz. Sol sebepti biz otandyq kınony damytýǵa múddelimiz», - dep atap ótti medıaholdıng bas dırektory Bek Kenjebaı.
Fılmderdiń kórsetilý ýaqyty týraly aqparatty telearnalardyń resmı saıtynan taba alasyz.
