Respýblıka kúnine oraı elordada áleýmettik az qamtylǵan otbasylarǵa azyq-túlik sebeti úlestirildi
ASTANA. KAZINFORM – Astanada Respýblıka kúnin merekeleý qarsańynda dástúr boıynsha muqtaj azamattarǵa azyq-túlik sebetteri taratylady, dep habarlaıdy elorda ákimdiginiń resmı saıty.
Astana qalasy ákimdigi men «Astana Jastary» eriktileri Qazaq oil kompanııasymen birlesip uıymdastyrǵan bul ıgi sharada elordanyń áleýmettik az qamtylǵan, kópbalaly otbasylarǵa, sondaı-aq erekshe balalardy tárbıelep otyrǵandarǵa 1 myń sebet azyq-túlik úlestirildi. Іs-sharaǵa 100-ge jýyq volonter qatysty.
«Respýblıka kúnine arnalǵan bul qaıyrymdylyq aktsııasy 3 jyldan beri ótkizilip keledi. Búginde elordanyń 5 aýdanyndaǵy áleýmettik osal otbasylarǵa 1 myń sebet taratyldy. Olar – kópbalaly otbasylar, jalǵyz basty analar, zeınetkerler, múmkindigi shekteýli azamattar, erekshe balalardy tárbıelep otyrǵan otbasylar. Azyq-túlik sebetinde kúndelikti ómirge qajetti taýarlar bar. Atap aıtsaq, kúnbaǵys maıy, qant, un, sút jáne t.b.», - dedi Astana ákiminiń keńesshisi Qýanysh Moldabek.
Qýanysh Moldabektiń aıtýynsha, jalpy salmaǵy 45 tonnadan asatyn azyq-túlik sebetteri búgin jetkiziledi.
«Biz Qazaq oil kompanııasyna osy qaıyrymdylyq sharaǵa belsendi qatysqany úshin alǵysymyzdy bildiremiz. Basqa da bıznes ókilderi men metsenattardy osyndaı ıgi isterge atsalysýǵa shaqyramyz. Qala ákimdigi mundaı sharalardy jyl saıyn ótkizip turady», - dedi Qýanysh Moldabek.
Igiligi mol mundaı is-sharaǵa azyq-túlik sebetin alǵan otbasylar alǵystaryn bildirdi.
«Mereke qarsańynda mundaı quttyqtaý biz úshin kútpegen jaǵdaı boldy. Osy sátti paıdalanyp, barshańyzdy Respýblıka kúnimen quttyqtaǵym keledi», - dep erekshe bala tárbıelep otyrǵan Astana turǵyny alǵysyn bildirdi.
Esterińizge sala keteıik, Astanada Respýblıka kúnine oraı 100-den astam mádenı-aǵartýshylyq, sporttyq jáne áleýmettik is-shara, onyń ishinde merekelik kontsertter, kórmeler, dóńgelek ústelder, ulttyq sport túrlerinen týrnırler jáne basqa da kóptegen sharalar josparlanǵan.
Іs-sharalar ortalyq alańdar men iri nysandarda, sondaı-aq turǵyn aýdandarda, bilim berý uıymdarynda jáne t.b. ótedi.
Sondaı-aq 25 qazan kúni saǵat 21:00-de Astana qalasyndaǵy Trıatlon saıabaǵynyń (Pırs aýdany) aýmaǵynda demeýshilik esebinen uıymdastyrylǵan merekelik otshashý josparlanyp otyr.
