Respýblıka kúnine oraı elimizde 10 jańa bilim berý nysany ashyldy
ASTANA. KAZINFORM — Memleket basshysy Qasym-Jomart Toqaevtyń bilim berý ınfraqurylymyn damytý jónindegi tapsyrmalaryn iske asyrý aıasynda Respýblıka kúnine oraı elimizde 10 jańa bilim berý nysany ashyldy. Jańa mektepter, balabaqshalar, oqýshylar saraılary men ınnovatsııalyq oqý ortalyǵy elimizdiń tórt oblysynda, sondaı-aq Astana men Almaty qalalarynda paıdalanýǵa berildi.
Astanada 1 500 orynǵa arnalǵan eki jańa oqýshylar saraıy ashyldy. Almatyda 880 oryndyq úsh balabaqsha paıdalanýǵa berildi. Jańa nysandar mektepke deıingi jáne qosymsha bilim berý múmkindikterin keńeıtip, balalardyń jan-jaqty damýyna zamanaýı jaǵdaı jasaıdy.
Shyǵys Qazaqstan oblysynyń Qystaý-Kúrshim aýylynda 50 oryndyq mektep ashyldy. Jetisý oblysynda Taldyqorǵan qalasynda 300 oryndyq mamandandyrylǵan «Bilim-ınnovatsııa» lıtseı-ınternatynyń jańa ǵımaraty jáne Kóksaı aýylynda 60 oryndyq mektep paıdalanýǵa berildi. Ulytaý oblysynyń Qarajal qalasynda 80 oryndyq №5 mekteptiń jańa ǵımaraty ashyldy.
Aqtóbede 300 oryndyq Aqtobe IT Hub ınnovatsııalyq oqý ortalyǵy ashyldy. Munda jasandy ıntellekt, robototehnıka, 3D-modeldeý, baǵdarlamalaý jáne tsıfrlyq medıa baǵyttary boıynsha bilim alýǵa jaǵdaı jasalǵan.
Oqý-aǵartý mınıstrligi málimetinshe, 2019 jyldan beri Qazaqstanda 1,1 mln oqýshy ornyna arnalǵan 1 342 mektep salyndy.
Memleket basshysynyń tapsyrmasyna sáıkes bilim berý ınfraqurylymyn damytý, oqýshy oryndarynyń tapshylyǵyn azaıtý, úsh aýysymdy jáne apatty mektepter máselesin sheshý, sondaı-aq balalarǵa qaýipsiz ári qolaıly jaǵdaı jasaý baǵytyndaǵy júıeli jumystar jalǵasyp jatyr.
El mektepterinde sadaq atýdan tegin sektsııalar iske qosylatynyn jazǵan edik.
