Respýblıka kúnine oraı Almatyda memlekettik nagradalar tabystaldy
ALMATY. KAZINFORM – Respýblıka kúnine oraı Almatyda memlekettik nagradalardy saltanatty túrde tabystaý rásimi ótti. Qazaqstan Respýblıkasynyń Prezıdenti Qasym-Jomart Toqaevtyń atynan marapattardy almatylyqtarǵa qala ákimi Darhan Satybaldy tabys etti.
Marapat ıeleri qatarynda qala men eldiń damýyna zor úles qosqan azamattar bar. Olardyń ishinde dárigerler men ustazdar, mádenıet jáne kásipkerlik salasynyń ókilderi, eńbek ardagerleri men qoǵam belsendileri bar.
Saltanatty jıyn barysynda Darhan Satybaldy Respýblıka kúni – el birligi men tutastyǵynyń, rýhanı qýaty men urpaqtar sabaqtastyǵynyń nyshany ekenin atap ótti.
– Táýelsizdiktiń alǵashqy jyldarynan bastap Qazaqstan ekonomıka, ǵylym men bilim, densaýlyq saqtaý, mádenıet jáne dıplomatııa salalarynda nyq ári senimdi qadammen alǵa basty. Búginde elimiz halyqaralyq arenada bedeldi, teń quqyqty áripteske aınaldy. Táýelsizdik jyldaryndaǵy barlyq jetistiktiń negizinde – halqymyzdyń eńbegi jatyr. Sondyqtan árbir dárigerge, ustazǵa, ınjenerge, kásipkerge jáne árbir almatylyqqa alǵysym sheksiz, - dedi Almaty ákimi.
Darhan Satybaldynyń aıtýynsha, Memleket basshysynyń bastamalary Qazaqstandy jańǵyrtý úderisine tyń serpin berip otyr. «Ádiletti Qazaqstan», «Zań men tártip», «Taza Qazaqstan», «Adal azamat» baǵdarlamalary qoǵamda ádildik, tártip pen senimdi nyǵaıtýǵa baǵyttalǵanyn tilge tıek etti.
Memleket basshysynyń Jarlyǵymen aqyn Marfýǵa Aıthojaǵa «Qazaqstannyń halyq jazýshysy» qurmetti ataǵy berildi. Qazaq radıosynyń ardageri Amanjan Serikov «Qazaqstannyń eńbek sińirgen qaıratkeri» atandy, al terapevt Nurzııa Dáýrenbekovaǵa «Qazaqstannyń eńbek sińirgen dárigeri» ataǵy tabystaldy.
Sonymen qatar eńbek ardageri Esentaı Tájıevke «Barys» ordeniniń ІІ dárejesimen marapattaldy. 19 almatylyq «Qurmet» ordenin, eki azamat «Eńbek Dańqy» ordeniniń ІІІ dárejesin, al úsh turǵyn «Parasat» ordenin ıelendi. «Eren eńbegi úshin» medalimen 45 adam, al qoǵamdyq jáne qaıyrymdylyq qyzmettegi belsendiligi úshin alty azamat «Shapaǵat» medalimen marapattaldy.
Aıta keteıik, rásimge Qazaqstan halqy Assambleıasynyń, Qoǵamdyq keńestiń, joǵary oqý oryndarynyń, mádenıet jáne jastar uıymdarynyń ókilderi qatysty.