Respýblıka kúnine oraı Aqmola oblysynyń 49 950 turǵynyna materıaldyq qoldaý kórsetiledi

Aqmola oblysynda Respýblıka kúnine oraı halyqtyń áleýmettik osal toptaryna jatatyn 49 950 adamǵa áleýmettik tólem jasalady, dep habarlaıdy Kazinform tilshisi.

Óńirdiń jumyspen qamtý jáne áleýmettik baǵdarlamalardy úılestirý basqarmasynyń málimetinshe, aqshalaı tólem alatyndardyń arasynda 18 jasqa deıingi múmkindigi shekteýli 3330 bala, sondaı-aq, 1, 2, 3-toptaǵy múgedek 26103 adam bar, onyń ishinde birinshi topta – 3093 adam, ekinshi topta – 10781 adam, úshinshi topta – 12229 adam. Budan bólek, eń tómengi zeınetaqy alatyn 20 550 zeınetkerge qoldaý kórsetiledi.

– Respýblıka kúnine oraı oblystyń 13 óńirinde, dálirek aıtsaq, Kókshetaý jáne Qosshy qalalary, Atbasar, Arshaly, Ereımentaý, Jaqsy, Jarqaıyń, Zerendi, Sandyqtaý, Tselınograd, Shortandy, Qorǵaljyn jáne Birjan sal aýdandarynda tólemder josparlanǵan. Bul aýdandardyń 11-de tólemder bıylǵy jyldyń 2 qazanynan bastap júrgizilip keledi. Al Qosshy qalasy jáne Qorǵaljyn aýdandarynda tólemder 25 qazanǵa deıin júzege asyrylady, – dedi jumyspen qamtý jáne áleýmettik baǵdarlamalardy úılestirý basqarmasynyń baspasóz qyzmetinen.

Vedomstvodan atap ótkendeı, oblystyń 7 óńirinde halyqtyń áleýmettik osal toptary sanatyndaǵy aqmolalyqtarǵa josparǵa sáıkes 2023 jyldyń 30 tamyzy – Konstıtýtsııa kúnine oraı qarajat tólengen.

– Aqkól, Astrahan, Bulandy, Býrabaı, Egindikól, Esil aýdandary men Sepnogorsk qalasynyń turǵyndary aqshalaı tólemderdi aldy. Erekshe qajettilikteri bar oblys turǵyndaryn kótermeleý boıynsha jumystar keshendi túrde júzege asyrylatyn bolady, merekege oraılastyrylǵan áleýmettik tólemder jalǵasady, – dep tolyqtyrdy vedomstvodan.

Aıta ketsek, budan buryn Aqmola oblysynda egini shyǵynǵa ushyraǵan sharýalarǵa qoldaý kórsetiletinin jazǵan edik.