Respýblıka kúnine berilgen áleýmettik tólemdi qaıtarý kerek: Pavlodarda jalǵan aqparat tarady
PAVLODAR. KAZINFORM — Pavlodarda Respýblıka kúnine oraı múmkindigi shekteýli balalarǵa tólengen áleýmettik kómekti keri qaıtarý qajet degen aqparat tarady. Qala ákimdigi bul málimettiń shyndyqqa janaspaıtynyn málimdep, ata-analardy alańdamaýǵa shaqyrdy.
Messendjerlerde eki nemese odan da kóp múmkindigi shekteýli bala tárbıelep otyrǵan otbasylarǵa tólem ár balaǵa jeke-jeke qate aýdarylǵany týraly habarlamalar paıda bolǵan. Onda ata-analardan artyq túsken qarajatty memleketke qaıtarý talap etilip jatqany aıtylady.
Alaıda Pavlodar qalasynyń ákimdigi bul aqparatty joqqa shyǵardy. Vedomstvonyń málimetinshe, áleýmettik tólemderdi qaıtarýǵa qatysty jaǵdaılar rastalmaǵan.
— Respýblıka kúnine oraı múgedektigi bar balalardy tárbıelep otyrǵan otbasylarǵa áleýmettik tólemder buryn qoldanysta bolǵan qaǵıdalarǵa sáıkes esepteldi. Oǵan saı áleýmettik kómek múgedektigi bar ár balaǵa jeke-jeke beriletin. Bıylǵy sáýir aıynan bastap jańa qaǵıdalar kúshine endi. Alaıda tehnıkalyq aqaýǵa baılanysty júıe tólemderdi burynǵy tártippen esepteýdi jalǵastyrǵan. Osyǵan baılanysty alynǵan qarajatty qaıtarýdyń qajeti joq degen sheshim qabyldandy. 2027 jyldan bastap tólemder jańa qaǵıdalarǵa sáıkes júrgiziledi, — dep habarlady qalalyq ákimdikten.
Sondaı-aq ákimdik ókilderi ata-analardan qaıta eseptelgen áleýmettik tólemderdi qaıtarý talap etilip jatqany týraly aqparat jalǵan ekenin málimdedi. Azamattardy tek resmı aqparat kózderine senýge jáne jalǵan málimetterdiń taralýyna jol bermeýge shaqyrdy.
Eske sala keteıik, Almatyda aqyly joldy jeńildikpen tóleýdi usynatyn jalǵan SMS-habarlamalar jiberilgen.
