Respýblıka kúnin beıbit ómirdiń qadirin túsine otyryp atap ótý kerek - japon professory
Japonııada Qazaqstannyń Respýblıka kúnine uqsas ulttyq mereke jyl saıyn 11 aqpanda atalyp ótedi. Ol - Kenkoký kınenbı meıramy. Bul týraly Kazinform tilshisine ál-Farabı atyndaǵy Qazaq ulttyq ýnıversıteti shyǵystaný fakýltetiniń dotsenti, shaqyrylǵan professor Nınomııa Takashı aıtyp berdi.
«Japonııada sizderdiń Respýblıka kúnine uqsas ulttyq mereke atalyp ótedi. Ol — jyl saıyn 11 aqpanda toılanatyn „Kenkoký kınenbı“ merekesi. Sebebi, 11 aqpan — Japonııa memleketiniń alǵash qurylǵan kúni. Ol sondaı-aq Japonııanyń alǵashqy ımperatory Djımmýnyń taqqa otyrǵan kúni», — deıdi Nınomııa Takashı.
Onyń sózinshe, japon men qazaq halqynyń arasynda biraz uqsastyq bar.
«Eki elge tán, ortaq nárse bar — jańa týǵan sábıdiń bóksesinde „mońǵoldyń kók daǵy“ bolady. Ulttyq taǵamdarǵa keler bolsaq, bul jerde uqsastyq az. Japon halqy qazaqtar sııaqty etti kóp jemeıdi. Men Qazaqstanǵa kelgenge deıin jylqy etin jep kórmeppin. Degenmen Japonııada qazaqtyń dástúrli taǵamy naýryz kójege uqsas taǵam bar. Ol „Nanakýsa gaıý“ dep atalady. Japondar ony qańtar aıynda jeıdi. Ol — jeti shópten jasalǵan kóje», — deıdi japon professory.
Qazaq tilinde jaqsy sóıleıtin ǵalym ony qalaı úırengenin aıtyp berdi.
«QazUÝ-dyń daıyndyq fakýltetinde eki jyl qazaq tilin oqydym. Ýnıversıtette oqı júrip, áriptesterimmen, taksı júrgizýshilerimen qazaq tilinde kóp sóılesip, jattyǵa berdim. Negizi qazaq tilin úırený maǵan ońaı bolǵan joq. Sebebi onsha jas emespin ári sózderdi esimde saqtaý qıyn boldy. Al qazir nátıjesin kórip tursyz, jaman emes dep oılaımyn», — deıdi keıipkerimiz.
Ol qazaqstandyqtardy búgingi Respýblıka kúnimen quttyqtady.
«Bul mereke — Qazaqstan halqy úshin beıbitshilik sımvoldarynyń biri. Meniń oıymsha, Qazaqstan halqy ǵana emes, álemdegi barsha halyqtar tynyshtyq pen beıbitshilikti qalaıdy. Sondyqtan Qazaqstanda jáne álemde tek tatýlyq bolsyn degen tilegim bar», — dedi ol.
Professordyń oıynsha, qazaqstandyqtar búgingi Respýblıka kúnin úıinde demalyp ta, jumysynda eńbek ete otyryp atap ótýine bolady.
«Beıbitshiliktiń qadirin túsine otyryp, otbasy men dostardyń ortasynda atap ótken durys dep oılaımyn. Ári bul kúni adamdar tek tanystaryna ǵana emes, beıtanys jandarǵa da meıirim kórsetip jatsa, artyqtyq etpeıdi», — deıdi ál-Farabı atyndaǵy Qazaq ulttyq ýnıversıtetiniń dotsenti, shaqyrylǵan professor Nınomııa Takashı.
Aıta keteıik, búgin qazaqstandyqtar ultty mereke — Respýblıka kúnin atap ótip jatyr.