Respýblıka kúnine oraı Astanaǵa 6 sheteldik teatr kele jatyr

ASTANA. QazAqparat – Erteń Astanada Ázirbaıjan Mámbetovtiń 90 jyldyǵyna arnalǵan teatr festıvali bastalady. Oǵan 8 qazaqstandyq, 6 sheteldik teatr qatysady, dep habarlaıdy QazAqparat tilshisi.

Bul týraly Astana qalalyq mádenıet basqarmasy basshysynyń orynbasary Nuran Qamzın ákimdiktiń onlaın brıfınginde málim etti.

«22-30 qazan aralyǵynda Astana qalasynda teatr aptalyǵyn ótkizý josparlanǵan. Osymen ekinshi ret elordada shymyldyǵyn túrip otyrǵan festıval Halyq qaharmany, KSRO jáne Qazaqstannyń Halyq ártisi, KSRO jáne Qazaqstan emlekmettik syılyǵynyń ıegeri, kórnekti teatr jáne kıno rejıseri Ázirbaıjan Mádıuly Mámbetovtiń 90 jyldyq mereıtoıyna arnalǵan», - dedi basqarma ókili.

Sondaı-aq, ol festıvalde baq synaıtyn ujymdardyń tizimin usyndy.

«Festıvalge respýblıkanyń túkpir-túkpirinen 8 teatr: Astana qalasynyń Jastar teatry, Óner teatry (Almaty), Nartaı Bekejanov atyndaǵy Qyzylorda oblystyq mýzykalyq drama teatry, Ǵabıt Músirepov atyndaǵy qazaq memlekettik akademııalyq balalar men jasóspirimder teatry (Almaty), Qalıbek Qýanyshbaev atyndaǵy memlekettik akaedmııalyq qazaq mýzykalyq drama teatry (Astana), Abaı atyndaǵy memlekettik mýzyka teatry (Semeı), Іlııas Omarov atyndaǵy Qostanaı oblystyq qazaq teatry, Ázirbaıjan Mámbetov atyndaǵy qazaq memlekettik drama jáne komedııa teatry (Astana) qatyspaqshy. Sonymen qatar bul festıvalde 6 sheteldik teatr óner kórsetedi. Bul - Mahtýmkýlı atyndaǵy túrkimen ulttyq mýzykalyq drama teatry, Ábdýmomynov atyndaǵy qyrǵyz memlekettik akademııalyq drama teatry, Geıdar Álıev atyndaǵy Tblısı memlekettik memlekettik ázerbaıjan teatry, Ózbek memlekettik Jızaq drama teatry, Sankt-Peterbýrg kameralyq teatry», -deıdi Nuran Qamzın

Festıvaldiń ashylýy 22 qazan kúni saǵat 19.30-da Ázerbaıjan Mámbetov atyndaǵy qazaq memlekettik drama jáne komedııa teatrynda ótedi.

«Aptalyqtyń saltanatty ashylýynda Qalıbek Qýanyshbaev atyndaǵy qazaq akademııalyq mýzykalyq drama teatrynyń «Ǵasyrdan da uzaq kún» spektakli usynylady. Aptalyq kezinde Ázirbaıjan Mámbetov rejıserlik etken spektaklder qoıylady. Jabylý saltanaty da osy teatrda 30 qazanǵa josparlanǵan. Festıvaldiń ótetin oryndary – Ázirbaıjan Mámbetov atyndaǵy qazaq memlekettik drama jáne komedııa teatry, Qalıbek Qýanyshbaev atyndaǵy qazaq akademııalyq mýzykalyq drama teatry jáne Mýzykalyq jas kórermen teatry», - dedi ákimdik ókili.