Respýblıka kúnin jańǵyrtý – táýelsizdik jolyndaǵy erik-jigerdi qurmetteý sımvoly - Marat Ahmetjanov

ASTANA. QazAqparat – Іshki ister mınıstrliginde Respýblıka kúnine arnalǵan saltanatty is-shara ótip, qyzmetkerlerge memlekettik nagradalar tabystaldy, dep habarlaıdy QazAqparat Ulttyq ulannyń baspasóz qyzmetine silteme jasap.

«Respýblıka kúnin merekeleý Joǵarǵy keńes Qazaqstan Respýblıkasynyń Memlekettik Egemendigi týraly Deklaratsııany qabyldaǵan 1990 jylǵy 25 qazanǵa baılanysty. Deklaratsııanyń aıryqsha róli Qazaqstan alǵash ret óziniń dúnıetanymy, jeke salt-dástúrleri, sondaı-aq óziniń bolashaǵy týraly kózqarasy bar biregeı aýmaqtyq sýbekt retinde ózin jarııalady. Merekelik kúntizbede Respýblıka kúnin jańǵyrtý – jańa Qazaqstan urpaǵynyń óz bastaýlarynyń sabaqtastyǵyn moıyndaýynyń, tarıhı sińirgen eńbegi men halqymyzdyń memlekettik táýelsizdik jolyndaǵy erik-jigerin qurmetteýiniń sımvoly», - dedi Іshki ister mınıstri, polıtsııa general-polkovnıgi Marat Ahmetjanov.

Vedomstvo basshysynyń kirispe sózinen keıin saltanatty jaǵdaıda qyzmette erekshe kózge túsken polıtsııa qyzmetkerleri men Ulttyq ulannyń áskerı qyzmetshilerine Memleket basshysy men ishki ister mınıstriniń atynan memlekettik jáne vedomstvolyq nagradalar tabys etildi.

Áskerı jáne qyzmettik boryshyn úlgili oryndaǵany, zańdylyq pen quqyqtyq tártipti qamtamasyz etýge belsendi qatysqany úshin el Prezıdentiniń Jarlyǵymen ІІ dárejeli «Aıbyn» ordeni 5571 áskerı bóliminiń komandıri, polkovnık Baqdáýlet Ospanbekovke, «Qurmet» ordeni 5573 áskerı bólimi án jáne bı ansambliniń qyzmet bastyǵy Elmıra Baqqalıǵa tabystaldy.

«Jaýyngerlik erigi úshin» medalimen 6655 áskerı bólimi komnadıriniń birinshi orynbasary-shtab bastyǵy, polkovnık Dáýren Jaǵıpparov, 6656 áskerı bóliminiń aǵa mamany, kishi serjant Nursultan Kenenbaev, 6654 áskerı bólimi zapastaǵy sarbazy, qatardaǵy jaýynger Meıirim Bımyrza, qaza tapqannan keıin 5571 áskerı bólimniń sarbazy, qatardaǵy jaýynger Almas Shahımov marapattaldy.

Sondaı-aq, Ulttyq ulannyń Bas qolbasshylyǵynda merekelik is-shara ótti. Qyzmettik mindetterin adal atqarǵany, jumysta joǵary nátıjelerge qol jetkizgeni úshin QR Іshki ister mınıstriniń orynbasary - Ulttyq ulannyń Bas qolbasshysy, general-maıor Erkin Botaqanovtyń buıryǵymen 290-nan astam áskerı qyzmetshi gramotalarmen, keýde belgilermen marapattaldy.

Merekelik shara Ulttyq ulan án-bı ansambliniń kontserttik baǵdarlamasymen aıaqtaldy.