Respýblıka kúnin qalpyna keltirý ádilettilik qaǵıdatynyń jarqyn kórinisi - Máýlen Áshimbaev
Bul týraly Senat tóraǵasy búgin óziniń Facebook paraqshasynda jazdy, dep habarlaıdy QazAqparat
«Bıyl elimiz úshin erekshe jyl. Memleket basshysy Qasym-Jomart Kemeluly Toqaevtyń bastamasymen aýqymdy saıası, áleýmettik-ekonomıkalyq reformalar júrgizilip jatyr. Olardyń barlyǵy Ádiletti Qazaqstan qurý qaǵıdasyna taban tireıdi. Osy rette Respýblıka kúnin ulttyq mereke retinde qaıta qalpyna keltirý de ádilettilik qaǵıdatynyń jarqyn kórinisi ekeni sózsiz.
Shyn máninde, 25 qazan biz úshin táýelsizdikke umtylys jolynda taǵdyrsheshti nátıjege qol jetkizgen kún retinde qymbat. Sebebi, Memlekettik egemendik týraly deklaratsııany qabyldaý arqyly halqymyz erkindik jolynda júıeli saıası-quqyqtyq qadam jasady. Sondyqtan bul kúnge ulttyq mártebe berip, ony jalpyhalyqtyq merekege aınaldyrýdyń mańyzy zor»,-deıdi Senat tóraǵasy.
Onyń sózinshe, eldik jáne ulttyq múddeni kózdeıtin osyndaı tarıhı sheshimderdi, eń aldymen, zańdyq turǵyda shegendeý qajet ekeni belgili. Osyǵan oraı Parlament qazirgi tańda birqatar mańyzdy zańdar qabyldap jatyr. Bul rette Senat depýtattary men Apparat qyzmetkerleriniń eńbegin erekshe atap ótken jón.
«Búgin Respýblıka kúnine oraı Senat qabyrǵasynda uıymdastyrylǵan merekelik jıynda bir top senator men Apparat qyzmetkerine Memleket basshysynyń Jarlyǵymen bekitilgen memlekettik nagradalardy saltanatty túrde tapsyrdyq. Sondaı-aq Álemdik jáne dástúrli dinder lıderleriniń VII Sezin uıymdastyrýǵa jáne ótkizýge aıryqsha úles qosqan belsendi azamattar da memlekettik nagradalarmen marapattaldy. Barsha marapat ıelerin búgingi jetistikterimen shyn júrekten quttyqtaı otyryp, olarǵa zor densaýlyq, jumystaryna tolaıym tabys tileımiz.
Kele jatqan ulttyq merekemiz – Respýblıka kúni qutty bolsyn! Eldigimiz eńseli, egemendigimiz baıandy bolsyn! Táýelsiz elimiz máńgi jasaı bersin!»,-dep jazdy Máýlen Áshimbaev.
Foto: senate.parlam.kz
